10 март чоршанба куни Мексика Конгрессининг қуйи палатаси наша ўсимлигидан ҳордиқ чиқариш, тиббий ва илмий мақсадларда фойдаланишга рухсат бериш бўйича қонун лойиҳасини маъқуллади. Бу қарордан кейин энди Мексикада каннабис, яъни наша ўсимлигининг дунёдаги энг катта бозорларидан бири юзага келиши мумкин.
Конгресснинг қуйи палатасидаги 316 киши ушбу қонунни маъқуллаган бўлса, 127 киши унга қарши чиққан. Энди ушбу қарорни Конгресснинг юқори палатаси кўриб чиқиш ва тасдқилаши керак.
Ушбу қонун лойиҳасига кўра, наша етиштириш, сотиш, тадқиқ этиш ва экспорт ёки импорт қилиш учун беш турдаги лицензияларга рухсат берилади. Фақат 18 ёш ва ундан катта бўлган одамларгина рухсат олган ҳолда каннабисни ўстириши, ташиши ёки истеъмол қилиши мумкин бўлади.
«Бугун биз тарихни яратмоқдамиз. Ушбу қонун билан наша Мексикада соғлиқни сақлашга жиддий муаммо туғдиради, деган нотўғри тушунча ортда қолади» деди «Морена» партияси депутати Симей Олвера.
“Морена” Мексика президенти Лопес Обрадорнинг ҳукмрон партияси ҳисобланиб, нашанинг қонунийлаштиришни Обрадор ҳам қўллаб-қувватлаган. Унинг сўзларига кўра, наша ва бошқа наркотик моддаларни қонунийлаштириш Мексикадаги қудратли наркобаронларга қарши курашда ёрдам бериши мумкин.
2013 йилда Уругвай наша ўсимлигини етиштириш ва унинг савдосига рухсат берган дунёдаги биринчи мамлакатга айланганди. Ҳозирда Аргентина, Чили, Перу ва Колумбияда нашадан тиббий мақсадларда фойдаланишга рухсат берилган.
Uzbek