Буюк Британиядан ҳам хушхабар бор!
Ҳозир нафақат дори-дармон, балки яхши хабарларга ҳам эҳтиёж катта. Шундай эмасми? Яхши хабарларнинг энг яхшиси эса, шубҳасиз, коронавирусга қарши вакцина яратилиши билан боғлиқ.
Бундан олдинроқ Россия ва Хитойда COVID-19 вакциналари синови муваффақиятли ўтгани тўғрисида маълум қилгандик. Қарангки, Оксфорд университети мутахассислари ҳам ўзлари яратган вакцинанинг кўнгиллиларда синовининг биринчи босқичи ижобий якунланганини эълон қилишди. “The Lancet” журналида шу ҳақда мақола чоп этилди.
“Ҳеч қандай жиддий ёмонн таъсири йўқ. Тадқиқот иштирокчиларининг қарийб 90 фоизида илк дозадан кейин зарарсизлантирувчи антитаначалар ишлаб чиқарилган”, дейилади ҳисоботда.
Инъекциядан кейин енгил иситма ва бош оғриғи бўлиши мумкин. Аммо синовдагиларда жиддий оқибатлар қайд этилмаган.
Биринчи босқичда вакцина 1077 кишида синаб кўрилди. Иккинчи босқичда эса 10 мингдан ортиқ одам жалб қилинади. Унинг якунидан кейингина вакцинанинг самарадорлиги ҳақида аниқ бир хулоса қилиш мумкин…
Қисқаси, вакцина устида изланиш олиб бораётган давлатлар маррага тезроқ етиб боришга интилмоқда. Чунки бу одамлар саломатлиги билан бирга, молиявий жиҳатдан ҳам жуда муҳим. Лекин айни пайтда бизнинг хаёлимиз бировнинг чўнтагига қанча маблағ тушишида эмас. Фикру зикримиз тезроқ ўша вакцина яратилсаю, бу балои офатдан бир кун бўлса-да эртароқ қутилсак. Шу боис маррага ким биринчи бўлиб етиб келса ҳам, барчамиз ғолибга айланамиз, десак муболаға бўлмас…
Uzbek