Франция Президенти Эммануел Макрон жорий йил 20 август куни Россия Президенти Владимир Путин билан Aфғонистондаги вазиятни муҳокама қилди. Муҳома жараёнида Макрон “Толибон” гиёҳвандлик ва қурол савдосини тўхтатиши кераклигини билдирди. Бу ҳақда ТАСС хабар бермоқда.
Қайд этилишича, Президентлар Aфғонистондаги вазият ва давом этаётган эвакуация ҳақида фикр алмашган. Сўнг Эмануел Макрон “Толибон” ҳаракатидан биринчи навбатда гиёҳвандлик ва қурол-яроғ савдосига қарши кураш, халқаро террорчилик ҳаракатлари билан алоқаларни тўхтатиш, аёллар ҳуқуқларини ҳимоя қилиши кераклигини билдирган.
Шунингдек, Макрон Путинни россиялик блоггер Aлексей Навальнийни озод этишга ҳам чақирган.
Эслатиб ўтамиз, Россия мухолифати етакчиси Алексей Навальний ўтган йилнинг 20 августида Россиянинг Томск шаҳрида заҳарланганидан сўнг, Германияда 4 ой даволаниб, жорий йилнинг 17 январь куни Россияга қайтди ва дарҳол ҳибсга олинди.
Кейинроқ “Ив Роше” иши бўйича суд қилинган мухолифатчи 3,5 йилга қамалди. Ўлишига бир бахя қолган Навальнийнинг ўзи бир қатор интервью ва чиқишларида жонига суиқасд қилинишида тўғридан-тўғри Путинни айблаган.
Uzbek