Сешанба куни Ливан парламенти тиббий мақсадларда фойдаланиш учун наша етиштиришни қонунийлаштирди.
Бу ўсимлик мамлакат молиявий инқироз билан курашаётган ҳозирги пайтда анчайин даромадли экспорт маҳсулоти бўлиши мумкин.
Ливанда наша ўсимлигини экиш ноқонуний бўлган бўлса ҳам, узоқ вақтдан бери Бека водийсининг унумдор майдонларида мазкур гиёҳ ошкора етиштирилиб келинган.
«Парламентнинг ушбу қарори ҳақиқатан ҳам иқтисодий сабабларга кўра қабул қилинган. Бугунги кунда иқтисодиётга ҳар қандай йўл билан ёрдам беришимиз керак. Ушбу ҳаракат ҳукумат учун даромад келтиради ва ўзи шундоқ ҳам ноқонуний равишда етиштирилган қишлоқ хўжалик маҳсулотини қонунийлаштиради ва аграр секторни ривожлантиради», деди Озод Ватанпарварлик Ҳаракати аъзоси Алаин Аун.
Ушбу қарорга Эрон томонидан қўллаб-қувватланадиган «Ҳизбуллоҳ» партиясигина қарши чиққан.
Маълумот учун, Ливан полицияси ўтган ойда мамлакатдаги энг йирик гиёҳванд моддалар савдосини тўхтатиб қолганди. Ўшанда Ливандан Африкага контрабанда билан жўнатилиши керак бўлган 25 тонна гашиш мусодара қилинган.
Uzbek