Киевда қатъий карантин пандемия билан боғлиқ оғир вазият туфайли яна икки ҳафтага узайтирилди. Бу ҳақда чоршанба куни шаҳар мери Виталий Кличко онлайн брифинг пайтида айтиб ўтди.
«Эпидемик вазият сезиларли даражада яхшиланмаётганлиги сабабли, бугун эрталаб шаҳар фавқулодда вазиятлар комиссияси шаҳримиздаги қатъий чеклов чораларини икки ҳафтага, яъни 30 апрелга қадар узайтириш тўғрисида қарор қабул қилди», деди у.
Ўтган кун давомида пойтахтда 1457 та янги юқтириш ҳолатлари аниқланди, 47 киши юқтириш оқибатида вафот этди. Мамлакатнинг барча минтақалари орасида касалланиш сони бўйича Киев етакчи ҳисобланади. Пандемия бошланганидан бери шаҳарда 180 мингдан ортиқ юқтириш ҳолатлари аниқланди, 112,5 минг бемор соғайди, 4 мингдан ортиғи инфекция асоратлари туфайли вафот этди.
Кличко айтишича, ҳозирги вақтда болалар инфекцияни аввалгига қараганда оғирроқ шаклда тобора кўпроқ юқтирмоқда.
Аввалроқ, Киевда 16 апрелгача қатъий карантин чораларини жорий этишга қарор қилинган эди. Болалар боғчалари ва мактаблари ёпиқ, жамоат транспорти фақат махсус йўлланмалар билан ишлайди ва фақат шаҳарнинг муҳим инфратузилмаси ишчиларини ташиш учун хизмат қилади. Озиқ-овқат ярмаркалари ишламайди, ва умумий овқатланиш корхоналари фақат етказиб бериш ёки олиб кетиш режимида хизмат қилади.
Uzbek