Ҳозирда Бразилия ҳамда Ҳиндистонда коронавирусга чалинганлар кескин отиб борар экан, ЖССТ эксперти Майк Раян дунёда ҳали CОВИД-19 нинг биринчи босқичи тугамаганлигини таъкидлади. Бу эса глобал иқтисодиётнинг тикланиши ҳамда халқаро саёҳатни тез орада қайта йўлга қўйилишига бўлган тахминларни йўққа чиқарди.
“Биз айни пайтда коронавируснинг иккинчи тўлқинига етиб келмадик. Биз вируснинг биринчи тўлқини ўртасидамиз. Биз ҳануз ушбу касаллик кўпайишда давом этаётган босқичдамиз” дейди ЖССТнинг ижрочи директори Майк Раян.
Ҳиндистонда вирусга чалинганларнинг кунлик сони 7 кундан бери рекорд даражада ўсмоқда. Бу мамлакатда 26 май куни 6535 кишига коронавирус ташхиси қўйилган бўлиб, касалланганларнинг умумий сони 145 380 кишини, вафот этганлар 4167 кишини ташкил қилмоқда. Аммо,вирус авж олишига қарамай ҳинд ҳукумати душанбадан бошлаб ички парвозларни қисман қайта йўлга қўйишга рухсат берган.
ЖССТ иқтисодий фаолиятни яқин орада қайта бошлашга умид қилаётган Бразилия президенти Жаир Болсонарони ҳам огоҳлантирган. Ташкилот Бразилия биринчи ўринда вирус тарқалишини назорат қилиш учун етарлича тест тизимига эга бўлиши кераклигини таъкидлаган.
Ҳозирда Бразилияда коронавирусни юқтириб олганлар 375 мингдан ошган бўлиб, бу мамлакат дунёда вирус тарқалиши бўйича АҚШдан кейин иккинчи ўринда турибди. Бразилияда вирус қурбонлари 23 мимгдан ортиқлиги қайд этилган, аммо, кўпчилик вафот этганларнинг ҳақиқий сони бундан юқори эканлигини айтмоқда.
Майк Раян Бразилиядаги ҳозирги ҳолат сабаб иқтисодиётга қанчалик зарар бўлмасин, аҳоли уйида қолиши кераклигини айтди.
“Сиз қўлингиздан келган барча ишни қилишингиз керак” деди Раян Бразлия ҳукуматига қарата.
Европада эса вирус энг кўп тарқалган мамлакат – бу Россиядир. 26 май куни Россияда қурбонлар сони рекорд даражада -174 кишига кўпайган. Ҳозирда бу мамлакатда КОВИД-19 ни юқтириб олганлар 360 мингдан ошиб кетди ва 3807 киши бу касаллик сабаб вафот этди. Россия касалланганлар сони бўйича дунёда учинчи ўринда турибди.
Жон Ҳопкинс университети маълумотларига кўра, ҳозиргача дунё бўйича коронавирусга чалинганлар сони 5,5 миллиондан ошди ва 346 мингдан ортиқ одам КОВИД-19 қурбонига айланди. Европада 170 минг атрофида ўлим қайд этилган бўлса, АҚШда бу кўрсаткич 100 мингни ташкил қилмоқда.
Аммо, мутахассислар кўплаб мамлакатлардаги қурбонлар сонини ҳисоблаш билан боғлиқ муаммолар туфайли вирусдан вафот этганларнинг ҳақиқий миқдори камайтирилган ҳолда қайд этилаётганини айтишмоқда.
Uzbek