19 декабрь куни Исроил Бош Вазири Бинямин Нетаняху коронавирусга қарши эмланди. Исроилда яқин бир неча кун ичида оммавий вакцинация бошланиши кутилмоқда.
71 ёшли Нетаняху ва Исроил соғлиқни сақлаш вазири Pfizer компнияси томонидан ишлаб чиқилган вакцинани қабул қилишган ва бу ҳодиса телевизор орқали жонли эфирда намойиш қилинган.
“Мен Соғлиқни сақлаш вазири Юли Эделштейн билан биргаликда биринчи бўлиб вакцинани қабул қилишни хоҳладим. Бундан мақсад сизни эмланишга чорлаш ва бунинг учун шахсий намуна бўлишдир” дейди Нетаняху телевизион чиқишида.
18 декабрда АҚШнинг вице-президенти Майк Пенс ҳам омма олдида эмланганди. Шунингдек, АҚШнинг сайланган президенти Жо Байден ҳам 21 декабрда вакцинани қабул қилади.
Исроил соғлиқни сақлаш вазирлигининг сўнгги маълумотларига кўра, мамлакатда коронавирус билан касалланганларнинг умумий сони 370 мингдан ошган. 9 миллионга яқин одам яшайдиган Исроилда 3000 дан ортиқ одам CОVID-19 сабаб вафот этди.
Uzbek