Эбола вирусини аниқлашда ўз ҳиссасини қўшган олим, Лондон Гигиена ва Тропик Тиббиёт Мактабининг директори Питер Пиот COVID-19 билан касалланди.
Профессор Питер 40 йил давомида юқумли касалликларга, шу жумладан ОИВ ва ОИТСга қарши курашга бошчилик қилган бўлсада, илгари у ҳеч қачон жиддий касал бўлмаган. Коронавирусга чалинган олим «ниҳоят, менга вирус юқди» дейди.
Питер 2017 йилда фанга кўрсатган хизматлари учун рицарлик унвонига сазовор бўлган. У оғир пневмония сабаб касалхонага ётқизилган ва ҳамон у ерда даволанмоқда.
Вирусни юқтиргандан кейин берган биринчи интервьюсида Пиот ўзида 19 март куни юқори иситма, ўткир бош оғриғи пайдо бўлганини ва вирус аломатлари кўрина бошлаганини айтди.
“Менда коронавирус билан боғлиқ бўлмаган бошқа аломатлар хам сезилди. Бош суягим ва сочларим жуда оғрир эди. Бу ҳолатни тушунтириш қийин. Мен ўз ҳаётимни вирусларга қарши курашга бағишладим ва ниҳоят улар мендан “ўч олмоқдалар”. Мен бир ҳафта давомида ҳаёт ва ўлим ўртасида қолдим. Мен ҳеч қачон жиддий касал бўлмаганман ва сўнгги 10 йил давомида бир кун ҳам касал бўлиб уйда қолмаганман. Соғлом турмуш тарзига қаттиқ амал қиламан ва мунтазам равишда юраман. Коронавирус менга хавф туғдиришининг ягона сабаби – бу менинг ёшимдир. Чунки мен 71 ёшдаман. Мен оптимистман, шунинг учун бу ўтиб кетади деб ўйлайман» дейди у.
Пиот 2014 йилда Ғарбий Африкада Эбола тарқалишига қарши жуда секин ҳаракат қилган Буюк Британия, БМТ ва ЖССТни танқид қилган эди.
«Илмий тадқиқотга кўра агар сиз Британия касалхонасига CОVID-19 билан келсангиз, сизнинг ўлиш эҳтимолинггиз 30 фоизга тенг экан. Бу 2014 йилда Ғарбий Африкада Эбола касаллигидан ўлим даражаси билан бир хил. Лекин, шундай бўлса ҳам мен Эбола эмас, балки коронавирусга чалинганимдан хурсандман” дейди Пиот.
Пиотнинг айтишича, биз вирус ҳақида қанчалик кўп билимга эга бўлсак, шунчалик кўп саволлар туғилаверади.
“Биз сувда сузаётган пайтимизда сузишни ўрганяпмиз. Шунинг учун мен журналистларнинг эпидемияни назоратга олишга уринаётган олимлар ва сиёсатчиларни танқид қилишларидан ғазабланяпман. Бу ҳозирги ваиятга жуда ноҳақ ёндашувдир.”
Uzbek