Жума куни дунёнинг етакчи давлатлари раҳбарлари видеоконференсия ўтказиб, CОVID-19 га қарши тестлар, дорилар ва вакциналар бўйича ишларни жадаллаштиришга ва уларни бутун дунё бўйлаб тарқатишга ваъда беришди. Аммо, бу конференцияда АҚШ иштирок этмади.
ЖССТ ташаббуси билан ўтказилган мазкур виртуал йиғилишда Франция президенти Эммануэль Макрон, Германия канцлери Ангела Меркель ва ЖАР президенти Кирил Рамафоса кабилар қатнашиб, пандемияга қарши курашда «муҳим ҳамкорлик»ни муҳокама қилдилар.
«Биз барча учун умумий бўлган муаммога дуч келмоқдамиз, уни фақат умумий ёндашув билан енгишимиз мумкин. Тажриба шуни кўрсатадики, ҳамма давлатларнинг имконияти бир хил эмас. Биз барчага ёрдам берамиз», деди ЖССТ Бош директори Тедрос Адҳаном Гебрейес виртуал учрашувни очар экан.
2009 йилда юз берган чўчқа гриппи пандемияси даврида вакциналар барчага бирдек етказиб берилмаган ва бу ҳолат танқид қилинганди. Ўшанда бадавлат мамлакатлар кўпроқ дори сотиб олишга қодир бўлганлар.
«Биз муҳтож бўлган одамларнинг барчасига дорини етказиб беришимиз керак. ОИТСдан сабоқ олишимиз керак. Бу касалликка қарши дори-дармонларни ҳамма олишидан олдин миллионлаб одамлар ўлди», деди Халқаро ОИТС, сил ва безгакка қарши курашиш жамғармаси раҳбари Питер Сандс.
Видеоконференцияга Осиё, Яқин Шарқ ва Америка давлатлари раҳбарлари ҳам қўшилишди, аммо Хитой, Ҳиндистон ва Россия каби бир қанча йирик давлатлар унда қатнашмади.
Франция Президенти Эммануэль Макрон G7 ва G20 мамлакатларининг барчасини ушбу ташаббусни қўллаб-қувватлашга чақирди ва шундай деди: «Биз ушбу ташаббус туфайли Хитой билан ҳам, АҚШ билан ҳам ярашиб оламиз. Чунки CОVID-19 га қарши кураш барча учун умумийдир. Бу курашда ғалаба қозониш учун ҳеч қандай бўлиниш бўлмаслиги керак».
“CОVID-19 га қарши 100 дан ортиқ вакциналар ишлаб чиқилмоқда. Уларнинг олтитаси аллақачон синовлардан ўтказилмоқда” деди GAVI ташкилоти бош директори доктор Сетҳ Беркли.
Uzbek