Англияда 8 мартдан бошлаб коронавирус сабаб ўрнатилган иккинчи локдаун юмшатилиб, мамлакатдаги миллионлаб болалар мактабга қайтишди. Англиялик ўқувчилар сўнгги икки ойда онлайн платформалар орқали таълим олиб келишаётганди.
Англия ҳукумати мамлакатдаги чекловларни тўрт босқичда енгиллаштиришни режа қилишган бўлиб, унинг биринчи босқичида мактаблар очилиши ҳам кўзда тутилганди. Ушбу режага кўра, Англияда июн ойининг охирига келиб вирус тарқалишини тўхтатиш учун ўрнатилган барча чекловлар бекор қилинади.
Буюк Британия Бош вазири Борис Жонсоннинг айтишича, барча мактабларнинг қайта фаолият бошлаши одатий ҳаётга қайтиш борасидаги йўл харитасининг биринчи босқичи ҳисобланади.
“Бугун Англиядаги ўқувчилар мактабларга қайтмоқдалар. Ўқитувчиларга, ота-оналарга, васийларга ва тарбиячиларга пандемия давомида болаларнинг билим олишлари учун қилган ишлари учун миннатдорчилик билдирмоқчиман. Барча мактабларни очиш бизнинг устувор вазифамиз ва нормал ҳаётга қайтиш бўйича йўл харитамизнинг биринчи қадамидир” дейди Жонсон.
Аммо, мактабларда жиддий чекловлар ўрнатилган. 4 ёшдан 11 ёшгача бўлган болалар ўқийдиган бошланғич мактабларда ўқувчилар бир-бирларига яқин келишлари мумкин эмас, уларнинг мактабга келиб-кетишлари назоратга олинади ва улар қўлларини тез-тез ювишлари керак бўлади.
Ўрта мактабларда эса бунданда кучлироқ чекловлар ўрнатилган. Бундай мактабларда ўқувчилар коронавирусга оммавий тест топширишмоқда. Шунингдек, улар синфхонада юз ниқобларини тақиб ўтиришлари шарт.
Шунингдек, 8 мартдан бошлаб Англиядаги қариялар уйларига ташриф буюришга ҳам рухсат берилди. Бундан ташқари, эндиликда кўчада икки киши учрашиши мумкин.
Uzbek