Британия ҳукумати ўтган ҳафтада Pfizer компанияси томонидан ишлаб чиқилган коронавирус вакцинасини рўйхатдан ўтказган ва аҳолини ушбу вакцина билан эмлаш бошланишини маълум қилганди. Бу мамлакатда 8 декбардан оммавий эмлаш жараёни бошланди.
9 декабрга келиб Британиянинг тиббиёт соҳаси вакиллари аҳолини Pfizer вакцинаси ҳақида огоҳлантириб, жиддий аллергик касалликлари мавжуд бўлган одамларнинг ушбу вакцинани қабул қилмаслиги кераклигини айтишди. Бунга ушбу вакцинани қабул қилган икки киши ёмон аҳволга тушиб қолгани сабаб бўлган.
Буюк Британиянинг Тиббий маҳсулотларни тартибга солиш агентлиги вакцина қабул қилган икки кишида юзага келган салбий ҳолат айнан вакцина билан боғлиқлигини ўрганмоқда. Ушбу икки кишида олдин аллергия мавжуд бўлган. Ҳозирда улар соғаймоқда. Аммо, расмийлар уларнинг айнан қандай ёмон аҳволга тушиб қолганини ошкор қилмаган.
“Тиббий маҳсулотларни тартибга солиш агентлиги эҳтиёткорлик юзасидан олдин аллергия касаллигига чалинган одамларнинг Pfizer вакцинасини қабул қилмаслик бўйича огоҳлантирди. Кеча аллергияси бўлган икки кишида ушбу вакцинанинг акс таъсири кузатилганидан кейин ушбу қарорга келинди. Ҳозирда ушбу икки киши тузалмоқда” дейди профессор Стивен Повис.
Шунингдек, агентлик реанимация жиҳозлари бўлмаган касалхонмаларда эмлашни амалга оширмаслик кераклигини айтган.
Uzbek