“Ислоҳот” сўзи бир истилоҳ ўлароқ қийматини пасайтирганига анча бўлган. Мустақилликдан кейин қарийб 20-25 йил тинимсиз такрорлайвериб ва алалоқибат қилаётган ишларимиз шунчаки кўзбўямачилик эканлиги фош бўлавериб, бу сўзга юкланган маънониям ўзгартириб юбордик.
Ҳозир бу сўз кўпроқ кўчма маънодаги кесатиққа ўхшаб қолди. Гарчи шундай бўлса-да, биз, ҳаммамиз ичимиздан истаётган ислоҳот, ўзгаришлар бўлаётирми бугун?
Ҳа, янгиланишлар бор. Фақат давлат буни босқичма-босқич амалга оширяпти. Яъни соҳалар бўйича! Мирзиёев давлат истиқболини ёшларда кўраётганини яширмаяпти.
Адлия, Молия, Қишлоқ хўжалиги, Меҳнат, Халқ таълими ва яна бир неча вазирлик ҳамда давлат идораларида бошқарув ёш, замонавий фикрловчи кадрлар қўлига топширилди. Ва бу ислоҳот тезда ўз нишонасини берди ҳам.
Ҳарқалай одамлар жамиятга янги ҳаво кирганини гапиришмоқда. Бироқ бу ислоҳотлар депсиниб жойида қолиб кетишиям мумкин. Сабаби, ҳокимлик институти деган қурилмамизга ҳали тегинилмаган.
Марказдан бошланган ислоҳотни ҳудудларга тўғри жорий қилиши керак бўлган вилоят ҳокимлари сафи ҳали бузилмаган. Ушбу жойларда яқин ўтмишнинг қайноқ қозонида қайнаган, ҳар қандай топшириқни беш минутда «есть» қиладиган ўтган замон кадрлар контингенти ушлаб турилибди.
Назаримда, уларнинг кўпчилиги Президент сиёсати моҳиятини тўлиқ тушунмаяпти. Нима қилиш керак, дейилса шу бажариляпти. Эҳтимол шунинг учун гоҳ жанубий, гоҳ шимолий вилоятлардан аҳолининг норозилик бақириқлари қулоққа чалинмоқда…
Тушунишимча, Президент мушт кучи билан эмас, қонун билан ишлайдиган давлат қуриш ниятида. Гарчи шундай экан, бир неча ўн йилларда табиатан ихтисослашиб қолган ҳудудлар ҳокимлари масаласини жиддий ўйлаб кўриш керак бўлади, менимча…
Албатта, буларнинг бари шахсий фикрлар.
Uzbek