Дунёдаги коронавирус энг кўп тарқалган мамлакат АҚШда 24 сентябрь куни касалланганлар сони 7 миллиондан ошди. Бу дунё бўйича CОVID-19 ни юқтириб олганларнинг 20 фоиздан ҳам кўпроғи Қўшма Штатларда қайд этилганини кўрсатади.
Шунингдек, АҚШ коронавирус сабаб вафот этганлар сони бўйича ҳам дунёда етакчилик қилмоқда. Бу мамлакатда қурбонлар сони 200 мингдан ошиб кетган. Бугунги кунга келиб Қўшма Штатларда ҳар куни 700 дан зиёд одам CОVID-19 сабаб оламдан ўтмоқда ва ўртача 40 минг кишига коронавирус ташхиси қўйилмоқда.
АҚШда вирусга чалинганлар энг кўп ҳудуд Калифорния штати бўлиб,бу ерда ҳозиргача 800 мингдан ортиқ одам касалланган.Иккинчи ўринни Техас,учинчи ўринни эса Нью-Йорк эгаллаб турибди.
Reuters нинг статистикасига кўра, сентябрь ойида АҚШдаги 50 та штатнинг ярмида янги касалланиш ҳолатлари олдингидан кўпайди. Бу ойда ўнта штатда кунлик янги ўсиш кўрсаткичи рекорд даражада кўтарилди.
Соғлиқни сақлаш мутахассисларининг айтишича, сўнгги пайтлардаги вирус тарқалишининг авж олишига мактаб ва университетларнинг очилиши ҳамда яқинда бўлиб ўтган “Меҳнат куни” байрами муносабати билан ташкил этилган зиёфатлар сабаб бўлган.
Uzbek