Жума куни АҚШнинг кўплаб штатлари коронавирусдан ўлим ҳолатлари кўпайганига қарамай карантин чораларини енгиллаштирди.
Айни пайтда Қўшма Штатлар коронавирус энг кўп тарқалган мамлакат бўлиб, бу мамлакатда 1,1 миллион дан ортиқ одам коронавирус билан касалланган ва уларнинг 65 мингга яқини вафот этган.
«Умид қиламанки, бизнинг мамлакатда ўлим ҳолати 100, 000 дан кам бўлади. Лекин, шундай бўлса ҳам ҳозирнинг ўзидаги қурбонлар сони даҳшатли даражада кўп», деди президент Трамп жума куни Оқ уйда. У ҳафтанинг бошида мамлакатда қурбонлар сони 60, 000 билан 70, 000 орасда бўлишини тахмин қилганди.
Кўплаб америкаликлар “Уйда қолинг” деган чақирувлардан чарчашди. Улар жума куни бир қатор штатларда чекловларни тугатиш талаби билан норозилик намойишлари ўтказишди. Бундай намойишлар Калифорнияда ҳам бўлиб ўтди. У ерда ҳукумат дам олиш кунлари пляжларни ёпиб қўйганди. Чунки, ўтган шанба ва якшанба кунлари одамлар тўп- тўп бўлиб соҳилга дам олишга чиқишган.
Трамп АҚШда коронавирусни даволаш учун ремдесивир номли препаратдан фойдаланишга рухсат берилганини эълон қилди. Тадқиқотлар натижасида ушбу дори CОVID-19 га чалинган жиддий аҳволдаги беморларнинг тезроқ тузалишига ёрдам бергани аниқланган.
Uzbek