Эронда ўтган ҳафта 5 кунлик намойишлар бўлиб ўтганидан хабарингиз бор. Ушбу намойишларни бостириш пайтида ҳукумат интернет тармоғини блоклаган ва бу АҚШ томонидан танқид қилинганди. 22-ноябр жума куни Қўшма Штатлар Эроннинг ахборот вазирига «интернетда кенг миқёсда олиб борилган сензурадаги» роли учун санксиялар жорий қилди. АҚШ Молия департаментига кўра, Эрон ахборот вазири Муҳаммад Жавод Азари-Жаҳроми Теҳроннинг «репрессив интернет сензураси» сиёсатини илгари сурган.
Шунингдек, Муаҳммад Жавод мухолифат фаолларига қарши курашда иштирок этган собиқ разведка ходими сифатида тавсифланган. «Эрон раҳбарлари очиқ ва эркин интернет тармоғи орқали ўзларининг ноқонуний фаолиятлари фош бўлиши мумкинлигини билишади, шунинг учун улар ҳукуматга қарши норозиликларни бостиришда интернетни блоклашга уринмоқдалар», деди АҚШ Молия департаменти котиби Стивен Мнучин.
Санксиялар эълон қилингач Муҳаммад Жавод твиттерда шундай ёзиб қолдирди: «Мен санксиялар жорий қилинган ягона Эронлик эмасман. Мендан олдин, Эрон АКТ стартаплари, ишлаб чиқувчилар, саратон касаллига чалинган беморларга санксиялар эълон қилинган. Мен ўз йўлимда давом этаман ва АҚШнинг Эроннинг ривожланишига тўсқинлик қилишига йўл қўймайман. ”
Uzbek