Хитой Шарқий Туркистон вилоятида мусулмон уйғурларга қарши «геноцид ва инсониятга қарши жиноятларни» амалга оширмоқда, деб айтди АҚШ Давлат департаменти инсон ҳуқуқлари бўйича йиллик ҳисоботида.
Сешанба куни эълон қилинган ушбу ҳисоботда геноцид ва инсониятга қарши жиноятлар йил давомида Шарқий Туркистонда асосан мусулмон уйғурлар ва бошқа диний озчиликни ташкил қилувчи одамларга нисбатан содир этилганлиги айтилган. Унда Хитойнинг бир миллиондан ортиқ тинч аҳолини ўзбошимчалик билан қамоққа олгани, мажбурий стерилизация қилиш, зўрлаш, қийноққа солиш, мажбурий меҳнат ва дин эркинлиги, сўз эркинлиги ва ҳаракат эркинлигини кескин тарзда чеклаётгани алоҳида таъкидланган.
«Биз инсон ҳуқуқларини ҳимоя қилиш ва уни суиистеъмол қилганларни жавобгарликка тортиш учун барча воситаларни ишга соламиз» дейди АҚШ Давлат котиби Антони Блинкен.
Хитойнинг Шарқий Туркистондаги уйғурларга нисбатан геноцидни амалга ошираётганини АҚШдан бошқа бир неча мамлакатлар ҳам расман эълон қилишган. Жумладан, Канада ва Буюк Британия ҳам Хитой ҳукуматининг ушбу ҳаракатларини қоралаган. Аммо, Хитой ҳукумати бу қораловларни рад этиб келмоқда.
Uzbek