Кеча “Афғонистоннинг 2-сонли президенти” Абдулла Абдулла махсус буйруқ билан “Афғонистоннинг 1-сонли президенти” Ашраф Ғанини лавозимидан “четлаштирди”. Баёнотда таъкидлаб ўтилганидек, “мен 9 март куни қасамёд қабул қилганимдан сўнг жаноб Ғанининг миллий бирлик деб номланувчи ҳукумати фаолияти ниҳоясига етди”.
Боз устига, жаноб Абдулла “Муҳаммад Ашраф Ғани, миллий бирлик ҳукуматининг собиқ раиси, энди президент ҳисобланмайди ва унинг фармон ҳамда фармойишлари кучга эга эмас. Уларни бажариш керак эмас” дея жиддий огоҳлантирган.
Айни чоғда Ашраф Ғани ҳам мудраб ўтиргани йўқ. Унинг матбуот котиби Содиқ Содиқий кеча, чоршанба куни бўлиб ўтган матбуот анжуманида Ғани Бош админстрация офиси, яъни президент сайловларигача жаноб Абдулла бошқарган тузилмалар фаолиятини тўхтатиш тўғрисидаги фармонни чиқарганини маълум қилди. Бундан келиб чиқадики, агар Абдулла Абдулла президент сифатида тан олинмаса, у ишсиз бўлиб чиқади.
Агар жаноб Абдулланинг ортида генерал Дўстум, жаноб Ғанининг ортида эса Афғон миллий армияси генераллари турмаганда, буларнинг барчаси кулгили туюлиши мумкин эди. Айтганча, бир пайтлари қўшинлар генерал Дўстумни жаноб Ғанининг дўстини “қийноққа” солгани учун қўлга олиб, қамамоқчи ҳам бўлишган. Бу вазиятда ғалаба Дўстум томонида бўлганди. Унинг яна такрорланишини исташмаса керагов…
Uzbek