“Ҳаёт яна қайтиб келди”: Саудия Арабистонида уч ойлик комендантлик соати бекор қилинди

0
2240
Фото: REUTERS/Ahmed Yosri

Уч ойлик комендатлик соати бекор қилинганидан сўнг якшанба оқшомида саудиялик одамлар илк бор кўчага эркин чиқиб овқатланиш ва сайр қилиш имконига эга бўлишди.

Қиролликда коронавирус тарқалишининг олдини олиш учун март ойида жуда қаттиқ карантин чоралари кўрилганди. Жумладан, кўплаб шаҳарларда 24 соатлик комендантлик соати жорий қилинди ва одамларга фақат озиқ-овқат ҳамда дори учунгина кўчага чиқишга рухсат берилди.

Ҳозиргача 157 мингдан ортиқ одам коронавирус билан касалланган ва 1267 киши вафот этган Саудия Арабистонида одамларнинг ҳаракати ва тадбиркорлик фаолиятига қўйилган тақиқлар май ойидан енгиллаштирила бошланди. 21 июнга келиб эса комендантлик соати бутунлай бекор қилинди.

“Биз комендантлик соати бекор қилинганини эшитишимиз биланоқ дўстларимиз билан кўчага чиқиш ҳақида гаплашдик. Ҳаёт яна қайтиб келди. Бу бошқача туйғу экан” дейди мотоциклчилар гуруҳи аъзоси Ҳишом Маҳрос.

Баъзи ресторанлар ушбу ҳодисани мусиқалар билан қарши олишди.

“Биз юрагимиздан севиндик. Биз Риёд нормал ҳаётга қайтганини нишонлаб ўз мижозларимиз билан бирга қўшиб куйладик. Умид қиламизки,тез орада бутун дунёда ҳам ҳаёт ўз изига тушиб кетади” дейди Риёддаги ресторанлардан бирида официант бўлиб ишловчи Аҳмад Моад.

Кўплаб ишларга рухсат берилганига қарамай, Қиролликда баъзи чекловлар сақланиб қолинади. Хусусан, 50 тадан кўп одамнинг тўпланиши мумкин эмас, мамлакат чегаралари чет элликлар учун ёпиқлигича қолади ва умра ибодатининг вақтинча тўхтатилиши ҳам давом этади.

Манба

Матнда хатоликни кўрсангиз, уни белгилаб Ctrl+Enter ни босинг.

Фикр матни

Илтимос, изоҳингизни киритинг!
Илтимос, исмингизни бу ерга киритинг