Туркия Республикаси Мудофаа вазирлиги 2019 йил 27 августда бошланган Россиянинг С-400 зенит-ракета тизимларининг иккинчи батареясини етказиб бериш якунланганлиги тўғрисида ёзма баёнот берди.
Туркиянинг «Anadolu Ajansi» агентлиги хабарига кўра, баёнотда, Туркия ва Россия Федерацияси томонидан 2017 йил 11 апрелда имзоланган ва Туркиянинг ҳаво мудофааси соҳасидаги эҳтиёжларини қондиришга қаратилган келишув доирасидаги комплексларнинг биринчи батареяси 2019 йил 12-25 июль кунлари мамлакатга етказиб берилган.
2019 йилнинг 15 сентябрида эса, Мюрт авиабазасига иккинчи С-400 ҳаво мудофааси ракета тизимининг таркибий қисмларининг сўнгги партияси етказиб берилганлиги айтилган. Ҳаводан мудофаа тизимларини ўрнатиш, шунингдек, уларнинг ходимларини ўқитиш давом этмоқда. Қурол-яроғ тизимларини тўлиқ ишга тушириш 2020 йил апрель ойига режалаштирилган.
Uzbek