Тинч океанидаги орол давлат Вануатуга коронавирус етиб борди. Бу билан Вануату дунёдаги коронавирусдан ҳоли бўлган кам сонли мамлакатлар қаторидан чиқди.
Вануату Соғлиқни сақлаш департаментининг чоршанба куни берган маълумотларига кўра, яқинда АҚШдан қайтган фуқарода CОVID-19 аниқланган. У Қўшма Штатлардан қайтганидан кейин карантинга олинган ва унuа ўша ердалигида коронавирус ташхиси қўйилган.
“Коронавирус карантин ичидаги фуқарода аниқланди. Шунинг учун бу ҳолат одамлар орасидаги эпидемия даржасига чиқмади” дейди Соғлиқни сақлаш департаменти.
Маълум бўлишича, коронавирусга чалинган шахс Вануатуга учиб келаётганда эҳтиёт чораси сифатида бошқа йўловчилардан яккаланган ҳолда олиб келинган. Чунки, у вирус юқтириш хавфи юқори бўлган АҚШдан ортга қайтаётган эди. Шунингдек, у аеропортга етиб келганидан кейин ҳам барча карантин чораларига амал қилган. Ҳозирда мазкур шахс билан контакт қилган барча одамлар назоратга олинган.
Вануату коронавирусдан сақланиш учун март ойида чегараларини ёпганди. Бу давлат яқиндагина ўз фуқароларини четдан қайтариб олиб келиш учун ўз чегарасини очди.
Uzbek