Владимир Путиннинг сешанба куни маълум қилишича, Россия коронавирусга қарши дунёдаги биринчи вакцинани яратди ва у одам организмида вирусга қарши узоқ вақт давом этадиган иммунитетни ҳосил қилади.
“Бугун эрталаб дунёда биринчи бўлиб янги коронавирусга қарши вакцина Россияда рўйхатдан ўтказилди” деди Путин вазирлар билан бўлган видеоконференцияда.
Путиннинг таъкидлашича, ушбу вакцина керакли текширувлардан ўтган. Шунингдек, Владимир Владимирович ўзининнг қизларидан бири ҳам мазкур вакцинани қабул қилганини айтган.
Россия расмийлари вакцинани биринчи навбатда қабул қиладиганлар ўқитувчилар, тиббиёт ходимлари ва вирус юқтириб олиш хавфи юқори бўлган бошқа касб эгалари бўлишини маълум қилишган.
Россия томонининг айтишича, дунёдаги биринчи сунъий йўлдош шарафига “Спутник В” деб номланган мазкур вакцинани ҳозиргача 20 та мамлакат 1 миллиард дозада буюртма қилган.
Россия коронавирус вакцинасини рўйхатдан ўтказган дунёдаги биринчи мамлакатга айланди.
Лекин, мамлакатдаги ва чет элдаги кўплаб экспертлар бу вакцинага шубҳа қилишмоқда. Улар бу вакцина одатда кўплаб инсонлар иштирок этадиган ва бир неча ой давом этадиган сўнгги 3 босқич синовидан ўтмаганини айтишмоқда.
Uzbek