22-ноябрда Жазоир пойтахтида намойишларнинг икинчи куни бўлиб ўтди. Намойишчилар келаси ой бўлиб ўтадиган президентлик сайловларига қарши чиқяптилар. Улар собиқ президент Абдулазиз Бутефлика билан боғлиқ сиёсий элитани ҳокимият тепасига келишидан норози бўлишмоқда. Ҳуқуқни ҳимоя қилувчи ташкилотларнинг хабар қилишича, бу намойишларда 80 дан ошиқ одам ҳибсга олинган.
Декабрнинг 12-санасига белгиланган президентлик сайловларида беш нафар номзод кураш олиб боришади. Собиқ президент Бутефлика унга халқ томонидан ўтказилган босим сабаб апрел ойида ишдан кетган. Ўшандан бери Жазоирда ҳар ҳафта норозилик намойишлари бўлиб ўтмоқда. Одамлар мамлакатда 1962-йилда мустақилликка эришилганидан бери амалда бўлган сиёсий тизимда катта ислоҳотлар ўтказишни талаб қилишмоқда.
Ўтган якшанбада сайловолди ташвиқоти бошланганидан буён ўнлаб одамлар ҳибсга олинган. Душанба куни тўрт киши 18 ой қамоқ жазосига ҳукм қилинди . TSA янгиликлар сайти интернет орқали тарқатган видеолавҳаларда намойишчилар: «Бу сайлов кампанияси эмас, қатағон кампанияси», дея норозилик билдиришди.
Uzbek