27 сентябрь куни Белоруссияда яна ўн минглаб одамлар кўчага чиқиб, мамлакатни узоқ йиллардан бери бошқариб келаётган Александр Лукашенконинг истеъфосини талаб қилишди. Полиция намойишчиларни тарқатиб юбориш учун кўзни ёшлантирувчи газдан фойдаланди.
Белоруссияда 9 август куни президентлик сайлови бўлиб ўтган ва унда Лукашенко ғалаба қозонгани маълум қилинганди. Аммо, Лукашенконинг рақиблари, хусусан, Светлана Тихановская сайловлда ғирромлик бўлганини айтди.
Шундан кейин белорус халқи қўзғалди. Бу мамлакатда қарийб икки ойдан бери намойишлар тўхтамаяпти. Якшанба кунги намойишда одамлар Лукашенкони “фирибгар” деб аташган ва “Светлана бизнинг президентимиз” деб бақиришган. Мазкур намойиш пойтахт Минскда ва бошқа шаҳарларда юз берди ва унда камида 53 киши ҳибсга олинди.
Александр Лукашенко сайловда ҳеч қандай фирибгарлик бўлмаганини таъкидламоқда. У ўтган ҳафтада оммага эълон қилмасдан президентлик қасамёдини ўтказиб олди. Бу эса ўзи шундоқ ҳам ғазаб отига минган белорусларни баттардан аччиқлантирди. Европа Иттифоқи, АҚШ ва Британия Лукашенконинг бу ҳаракатини қоралаган. Франция президенти Эммануел Макрон эса Лукашенко ўзи хоҳлаб истеъфо бериши кераклигини айтди.
“Биз Белоруссияда ҳукумат инқирози юз бераётганига гувоҳ бўляпмиз. Бу ҳукумат демократия қонунларини қабул қила олмайди. Лукашенконинг кетиши шартлиги очиқ кўриниб турибди” дейди Макрон.
Uzbek