Президент Ражаб Таййип Эрдўғаннинг айтишича, ҳозирда Туркия Бирлашган Араб Амирликлари билан дипломатик алоқаларни тўхтатиш ва бу мамлакатдан ўзининг элчисини чақириб олишни ўйлаб кўрмоқда. Бунга БААнинг Исроил билан алоқаларни нормаллаштириш борасида тузган битими сабаб бўлган.
Шунингдек, Туркия Ташқи ишлар вазирлиги ҳам БААнинг бу келишувини қоралар экан, тарих БААнинг “иккиюзламачилигини” ҳеч қачон унутмаслигини таъкидлади. Ушбу шартнома Ўрта Шарқдаги ҳукмронликни ўзгартиши мумкинлиги айтилмоқда.
Фаластин раҳбарлари БААнинг бу ҳаракатини “орқадан пичоқ уриш” бўлганини таъкидлашган.
“Фаластинга қарши бу юришни ҳазм қилиб бўлмайди. Энди, Фаластин БАА билан алоқа эшикларини ёпади ёки у ердан элчисини чақириб олади. Биз ҳам худди шу ишларни қилишимиз мумкин. Мен Туркия Ташқи ишлар вазирига айтдимки, биз Абу Даби билан дипломатик алоқаларни узиш ва у ердан элчимизни қайтариш бўйича ишларни амалга оширимиз мумкин” дейди Эрдўған.
Бундан аввалроқ Туркия Ташқи ишлар вазирлиги БАА ўзининг ваъдасига хиёнат қилганини айтиб, фаластинликларнинг бу битимга қарши чиқишга ҳақлари бор эканини таъкидлаганди.
“Тарих ва бу ҳудудда яшайдиган одамларнинг виждони бу иккиюзламачиликни унутмайди ва уни ҳеч қачон кечирмайди. БААнинг 2002 йилда тузилган Араб тинчлик шартномасини бузиши жуда хавфли” деган Туркия Ташқи ишлар вазирлиги.
АҚШ воситачилигида тузилган БАА-Исроил битимига биноан, Исроил Ғарбий Соҳилни аннексия қилиш бўйича режасини вақтинча тўхтатди. Бу шартнома орқали БАА Исроил билан келишган учинчи араб мамлакатига айланди. Бундан олдин 1979 йилда Миср ва 1994 йилда Иордания ҳам Исроил билан алоқаларни тўлиқ тиклаганди.
Манба
Uzbek