Таъкидланишича, ушбу масалани муҳокама қилиш Аргентина саммити майдонларида давом эттирилади
Туркия президенти Ражаб Тоййиб Эрдоған, Керч бўғозидаги содир бўлган ҳодиса бўйича Анқаранинг воситачи сифатида иштирок этиши мумкинлигини билдирди, дея хабар беради РИА Новости.
Эрдоғаннинг сўзларига кўра, бу имконият хақида Россия президенти Владимир Путин билан телефон орқали суҳбат давомида муҳокама қилинган.
Шунингдек, Украина Президенти Петро Порошенко ва АҚШ президенти Дональд Трамп билан бўлиб ўтган суҳбат чоғида бу мавзуга тўхталиб ўтилган.
«Бу масала бўйича нима қилиш кераклигини муҳокама қилдик» -дея таъкидлаган Туркия раҳбари, қўшимча қилиб ушбу масала бўйича мунозаралар Аргентинада бўлиб ўтадиган G 20 саммитида давом этишини айтган.
Эслатиб ўтамиз, Украина ҳарбий денгиз кучлари Қўмондонлиги 25 ноябрь куни Керч боғози томон ҳаракатланган Украинанинг учта ҳарбий кемаси Россия махсус хизматлари томонидан асирга туширилган хақида баёнот берилган эди. Украина президенти Петр Порошенко Мамлакат миллий хавфсизлик ва мудофаа Кенгаши мажлисида Украинада ҳарбий ҳолат эълон қилинишини қўллаб-қувватлашини ва Олий Радага мурожаат қилиб ушбу масалани кўриб чиқишни сўраганди. Ўз навбатида, Олий Рада Украинада ҳарбий холат эълон қилиш бўйича қарорни тасдиқлаган.
Жумладан, Россия ҳам, давлат чегарасини бузганлик бўйича жиноий иш қўзғади ва Азов денгизидаги вазият юзасидан БМТ Хавфсизлик Кенгашининг фавқулодда мажлиси ўтказилишини талаб қилган эди.
Азов денгизидаги воқеадан сўнг, Россия билан бир пайтда Украина ҳам БМТ Хавфсизлик Кенгаши мажлиси чақирилишини талаб қилган эди. БМТ Хавфсизлик Кенгаши Россиянинг талаби бўйича берилган кун тартибини рад этиб, Украина талаби бўйича таклифни кун тартибида кўриб чиққан эди.
БМТ Хавфсизлик Кенгашидаги Қўшма Штатлар ва Буюк Британия вакиллари Украинанинг суверенитетини ва унинг ҳудудий яхлитлигини, жумладан, унинг ҳудудий сувларида навигация ҳуқуқларини тўлиқ қўллаб-қувватлашини таъкидлаган эдилар. Улар халқаро ҳуқуққа мувофиқ Россияни Азов денгизида Украина портларига тўсиқсиз киришни таъминлашга чақиргандилар. «… Россия зудлик билан ноқонуний ҳаракатларини тўхтатиши ва Россия барча давлатларнинг навигация ҳуқуқ ва эркинликларини ҳурмат қилиш керак», деган эди АҚШнинг БМТдаги доимий вакили Никки Хейли.
Хитой ва Қозоғистон вакиллари Украина ва Россияни вазиятни янада кучайишини олдини олишга ва барча масалаларни мулоқот ва маслаҳат йўли билан ҳал қилишга чақирган эди.
Керч бўғозида содир бўлган воқеа муносабати билан Бирлашган Миллатлар Ташкилоти, Россия ва Украинани зўравонликнинг янада кучайишига ва «кутилмаган натижаларга» олиб келиши мумкин бўлган ҳаракатлардан қочишга чақиргани эди. БМТ Бош котибининг сиёсий масалалар бўйича ўринбосари Розмари Дикарло Украина талабига биноан чақирилган Хавфсизлик Кенгашининг фавқулодда йиғилишида сўзга чиққан эди.
“Россия ва Украина Азов денгизини ўзларининг ички сувлари деб ҳисоблашади. 2014 йилда Қримнинг анексия қилиниши билан бу сувларда кескинликлар кучайди, бу ҳақда БМТ Бош Ассамблеясининг бир неча қарори қабул қилинди», – деган эди Бош котиб ўринбосари. Унинг сўзларига кўра, 2016 йилда Украина «Қора ва Азов денгизи ва Керч бўғозига қирғоқ давлатларининг ҳуқуқларига оид низо муносабати билан «Денгиз ҳуқуқи тўғрисида»ги БМТ конвенциясининг бузилиши тўғрисидаги ишни кўриб чиқиш ташаббусини кўтариб чиққан ҳамда ўз навбатида, Россия Федерацияси бу иш суднинг юрисдикциясига кирмаслигини таъкидланган.
Uzbek