АҚШ президенти Дональд Трамп коронавирус текширувидан ўтди ва унда касаллик аниқланмади, дея хабар берди Трампнинг шахсий шифокори. Оқ уй текширув натижаларини шанба куни кечқурун эълон қилди.
Трамп аввалроқ вирусни юқтириб олган 3 киши билан кўришганига қарамай, текширувдан ўтишга қаршилик кўрсатаётганди.
Коронавирус ҳозирги кунда АҚШда 2200 дан ошиқ одамга тарқалди ва камида 50 кишининг ўлимига сабаб бўлди.
14 март куни Оқ уй Трамп ва вице-президент Майк Пенс билан яқин алоқада бўлган ҳар бир кишини, шу жумладан Оқ уйдаги брифингга ташриф буюрадиган мухбирларни ва Овал кабинетига кирган ҳар бир кишининг ҳароратини текшириш амалга оширлаётгани ҳақида маълум қилди.
Шунингдек, вице-президент Пенс шанба куни Оқ уй ходимларига хат билан мурожаат қилар экан, уларга жисмоний алоқа қилмаслик, қўлларни тез-тез ювиш ва касал бўлганларида уйда қолиш каби эҳтиёт чораларини кўриш кераклигини эслатган.
«Ўзимиз ва ҳамкасбларимизнинг хавфсизлигини сақлаш учун тегишли чораларни кўриш ҳар биримиз учун зарурдир», деб ёзган Пенс.
Uzbek