16 апрель куни Ўзбекистон ҳукумати “Cotton Campaign” номли халқаро ҳуқуқни ҳимоя қилувчи ташкилотга ўз пахтасига қўйилган бойкотни олиб ташлаш бўйича мурожаат қилгани ҳақида хабар қилган эдик. Унда ҳукумат мазкур ташкилотдан Ўзбекистонда мажбурий меҳнатни тугатиш бўйича эришилган ютуқларни ва ҳозирги иқтисодий инқирозни инобатга олган ҳолда пахтага қўйилган бойкотни бекор қилишни сўраганди.
Ҳисоб-китобларга кўра, агар бойкот бекор қилинса мамлакат ғарб бозорларида пахта ва тўқимачилик маҳсулотларини сотиш орқали бу йил қўшимча 1 миллиард доллар даромад олиши мумкин.
«Пахта бойкотининг бекор қилиниши – бу жуда зарур иш ўринларини яратиш ва CОVID-19 инқирози пайтида ўзбекларнинг иқтисодий фаровонлигини таъминлашга имкон берадиган чоралардан биридир.Ўзбекистонда биргина тўқимачилик саноатида 200 минг киши ишлайди. Уларнинг иш ҳақи 1 миллион кишининг молиявий эҳтиёжини таъминлайди» дейилган ҳукумат баёнотида.
Аммо “Cotton Campaign” ташкилоти бу бойкотни бекор қилиш учун Ўзбекистон мажбурий меҳнатни бутунлай йўқ қилиши ва фуқаролик жамияти қуриш бўйича ислоҳотларни амалга ошириши кераклигини маълум қилган. Бундай ислоҳотларга мамлакатда ишчилар ҳуқуқларини ҳимоя қилувчи Нодавлат Нотижорат ташкилотларини рўйхатга олиш кабилар киради.
Америка кийим-кечак ва поябзал ассоциациясининг вице-президенти Нейт Херман Ўзбекистонда ишчиларни ҳимоя қилиш учун «қўшимча кафолатлар» кераклигини айтди.
«Биз Ўзбекистоннинг мажбурий меҳнатга барҳам бериш йўлида эришган тарихий ютуқларини тан оламиз ва бундан хурсандмиз. Бироқ, ташкилотимиз аъзоларнинг мажбурий меҳнатга нисбатан қаттиққўл сиёсати, қулликка қарши қонунчилик талаблари ва Халқаро Меҳнат Ташкилотининг Ўзбекистонда 2019 йилги пахта йиғим-терими пайтида 100 мингдан ортиқ одам мажбурий меҳнатга жалб қилинганлигини аниқлаганлиги сабабли бизга мамлакатда ишчилар ҳуқуқини ҳимоя қилиш борасида кафолат керак. » деди Херман.
Маълумот учун, мазкур пахта бойкоти 2006 йилда Ўзбекистонни талабалар ва бюджет ташкилотлари ходимларини, шу жумладан ўқитувчилар ва шифокорларни кам маош эвазига пахта теришга юбориш амалиётидан воз кечишга мажбурлаш мақсадида бошланган.
Бу бойкотни Amazon,Calvin Klein, Adidas вa Inditex каби жаҳонга машҳур 300 дан ортиқ компания қўллаб-қувватламоқда. Натижада, Ўзбекистон пахта ва тўқимачилик маҳсулотларини асосан Осиё бозорларида сотмоқда. Бу нархларнинг пасайиши ва ўсиш имкониятларининг чекланишига олиб келмоқда.
Uzbek