Британия ҳукуматининг бош илмий маслаҳатчиси Патрик Валланснинг огоҳлантиришича, коронавирусга қарши ишлаб чиқилган вакцина уни батамом йўқ қилиши эҳтимолдан йироқ бўлиб, CОVID-19 ҳеч қачон йўқолиб кетмаслиги мумкин.
“Менинг ўйлашимча, биз ҳеч қачон коронавирусни батамом енга оладиган вакцинага эга бўлмаймиз. Бу вирус дунё бўйлаб айланиб юраверади ва у эндемик касалликка айланади. Менинг бу борадаги фикрим шундай ва кўплаб одамлар унга қўшилишади деб ҳисоблайман. Вирусга қарши курашда олиб борилаётган ишлар яхшилангани ва вакцина қабул қилиб CОVID-19 га чалиниш эҳтимолингиз камайгани сари коронавирус мавсумий шамоллашдек оддий касалликка айланади” дейди Сер Патрик Валланс Британия ҳукумати қўмитасига.
Эндемик касаллик деганда одамлар орасида доимий равишда мавжуд бўладиган ҳасталиклар тушинилади. Бунга мавсумий гриппни мисол қилиб келтириш мумкин.
Валланснинг айтишича, батамом йўқ қилинган ягона касаллик бу чечакдир. Шунингдек, Валланс самарали вакцина баҳоргача тайёр бўлмаслигини таъкидлаган.
Ҳозирги кунда АҚШ, Хитой, Британия ва бошқа давлатларда коронавирусга қарши вакциналарнинг сўнгги синовлари ўтказилмоқда. Лекин, олиб борилаётган сўнгги тадқиқотларга кўра, CОVID-19 га қарши вакцина одам организмида узоқ муддатли иммунитет ҳосил қилмайди. Бу эса одамлар ҳар йили эмланишга эҳтиёж сезишларини англатади.
Uzbek