Picodi.com таҳлилчилар гуруҳи 2021 йилнинг биринчи ярмида ўтган йилга нисбатан ёқилғи нархларининг қандай ўзгарганлигини кузатиб, Европа ва МДҲ давлатлари аҳолиси ўртача иш ҳақига неча литр бензин сотиб олиши мумкинлигини ҳисоблаб чиқди.
Маълум бўлишича, 2020 йилнинг биринчи ярмидан 2021 йилнинг шу даврига нисбатан ёқилғи нархининг энг катта сакраши Тожикистон (30,1%), Aрманистон (+22,8%), Грузия (+ 17,4%) ва Украинада (+ 13,7%) содир бўлган.
Шунингдек, Озарбайжон ва Ўзбекистонда ёқилғи нархи 2020 йилга нисбатан 7,7 фоизга, Россияда 5,5 фоизга, Молдовада эса 10,9 фоизга ошган.
Бензин индекси 2021
Европа ва МДҲ давлатлари орасидаги энг арзон ёқилғи бу Қозоғистонда бўлиб, у ерда 1 литр бензин атиги 0,43 доллар туради. Финляндияда эса ёқилғи бошқа давлатларга нисбатан жуда қиммат. У ерда 1 литр бензин нархи 1,90 долларга тенг.
Россияда 2021 йилнинг биринчи ярмида ёқилғининг ўртача нархи 48,35 рублни (0,65 доллар) ташкил этган.
Европа ва МДҲ мамлакатларида ўртача иш ҳақи билан қанча бензин сотиб олиш мумкин?
Жорий йилги рейтингда МДҲ ва Европа давлатлари орасида ўртача иш ҳақига энг кўп бензин сотиб олиш бўйича Германия етакчилик қилмоқда. Бу давлатда ўртача ойлик эвазига 1786 литр бензин сотиб олиш мумкин. Кейинги ўринларни Швеция (1771 литр) ва Финляндия (1589 литр) банд қилган.
Саккизинчи ўриндан жой олган Россияда ойлик иш ҳақи 52 143 рубл бўлиб, руслар бу пулга 938 литр бензин харид қила олади. Қозоғистон ушбу рейтингда Россияни ортда қолдирди. Мамлакатдаги ўртача ойликка 1015 литр бензин беради.
Жанубий Кавказ мамлакатларида Озарбайжон яна ёқилғи нархи бўйича етакчи ўринни эгаллади – бу эрда ўртача иш ҳақига 561 литр бензин сотиб олишингиз мумкин. 21ўриндан жой олган Грузияда эса 359 литр бензин беради.
Рейтингнинг сўнгги ўринларидан Тожикистон(167 литр), Aрманистон(309 литр) Ўзбекистон(317 литр) ва Қирғизистон(355 литр) жой олган.
Жаҳон етакчилари
Дунё бўйича энг арзон ёқилғи Жазоирда бўлиб, бу давлатда 1 литр бензин 0,34 долларга, энг қиммати эса Гонконгда бўлиб, 1 литр бензин 2,44 долларга тенг.
Таъкидланишича, бу сафар ҳам бензиннинг ўртача иш ҳақига нисбати асосида тузилган халқаро рейтингининг шоҳсупасидан Форс кўрфази мамлакатлари жой олган. Уларнинг жойлашуви қуйидагича:
Қатар – 6 532 литр;
Саудия Aрабистони – 5,170 литр;
Қувайт – 5,158 литр.
Шунингдек, Aмерика Қўшма Штатларининг аҳолиси ўртача иш ҳақи билан 4723 литр, Aвстралия – 4128 литр, Канада – 2616 литр, Хитой – 955 литр бензин сотиб олиши мумкин.
Халқаро рейтингда сўнгги ўринни Куба эгаллади. «Эркинлик оролида» ўртача иш ҳақи эвазига атиги 26 литр бензин сотиб олиш мумкин. Бироз яхшироқ натижани 214 литр бензин билан Замбия кўрсатди. Жанубий Aмерикада жойлашган Венесуэлада ўртача иш ҳақи эвазига 230 литр бензин харид қила оласиз холос (бензиннинг ўртача нархи 0,002 доллар).
Uzbek