Австралия ҳукумати 14 июлдан бошлаб одамларнинг ҳаракатланишига бўлган чекловларни кучайтирди.
Чунки, ҳозирда мамлакатнинг жанубий-шарқий ҳудудида вирус авж олмоқда ва янги касалланиш ҳолатларини бартараф этишда қийинчиликка дуч келинмоқда.
Ҳозиргача Австралияда CОVID-19 га чалинганлар сони 10 мингдан ошди ва 110 киши вафот этди.
Коронавируснинг иккинчи тўлқинининг юзага келиш хавфи ошиб борар экан, Австралиянинг икки штатида чегаралар ёпилди ва аҳоли сони бўйича биринчи ўринда турувчи Жанубий Велс штатида одамларнинг кўпчилик бўлиб тўпланишларига чеклов қўйилди.
Ҳозирда мамлакатдаги коронавирус ўчоғига айланган Виктория штатида янги касалланишлар сони ортиб бормоқда. Бу ерда ўтган сутка давомида 270 та янги касалланиш ҳолатлари аниқланди ва штатдаги беморларнинг сони 2000 га яқинлашди.
Бу штатнинг маркази Мелбрун шаҳрининг ўтган ҳафтада карантинга олингани ҳам коронавирус тарқалишининг камайишига олиб келмаяпти. Бу мегаполисда 5 миллион аҳоли истиқомат қилади.
“Биз ҳали вируснинг авж нуқтасидан ўтмадик. Умид қиламанки, бу ҳафта касалланишлар сони камая бошлайди. Аммо, бундай бўлишига ҳеч қандай кафолат йўқ” дейди Виктория штати бош тиббиёт ходими Брет Суттон.
Австралия ҳукумати қатъий чекловлар эвазига коронавирусга чалинганлар сонининг у қадар ошиб кетишининг олдини олишга эришаётганди. Лекин, Виктория штатида одамлар орасида вирус тарқалиши ва Жанубий Велсдаги касалланганлар сонининг ошиши бошқа штатларни ҳам хавотирга солмоқда. Шунинг учун улар ҳам чекловлар жорий қилишни бошлашди.
Масалан, Жанубий Австралия штати 20 июлдан бошлаб Жанубий Велс билан чегаларни очиш режасидан воз кечди. Квинсленд штатида эса Сиднейнинг икки ҳудудига бориб қайтган одамларни икки ҳафталик мажбурий карантинга олиниши белгиланди.
“Бизнинг асосий вазифамиз фуқароларимизнинг соғлиги, хавфсизлиги ва фаровонлигини таъминлашдир” дейди Жанубий Австралия штати раҳбари Стивен Маршал.
Uzbek