Ўтган ҳафта ЖССТ томонидан пандемияга қарши олиб бораётган кураш АҚШ Президенти Дональд Трампнинг танқидига учради ва АҚШ ушбу ташкилотни молиялаштиришни тўхтатаётгани ҳақида эълон қилди.
АҚШ Давлат котиби Майк Помпеонинг таъкидлашича, Хитойнинг ҳукмрон Коммунистик партияси коронавирус тарқалиши ҳақида ЖССТга ўз вақтида хабар бермаган.
Жаҳон Соғлиқни Сақлаш Ташкилотининг раҳбари Тедрос Адҳаном Гебрейесус чоршанба куни АҚШнинг ушбу ташкилотни молиялаштиришни тўхтатиб қўйиш қарорини қайта кўриб чиқишига умид қилаётганини айтди.
«Умид қиламанки, молиялаштиришнинг тўхтатилиши қайта кўриб чиқилади ва АҚШ яна бир бор ЖССТнинг ишини қўллаб-қувватлайди ва одамлар ҳаётини сақлаб қолишда давом этади. Умид қиламанки, АҚШ бу маблағ нафақат бошқа давлатларга ёрдам бериш, балки АҚШнинг хавфсизлигини таъминлаш учун ҳам муҳим сармоя эканлигини тушунади» деди Тедрос.
Шунингдек, ЖССТ раҳбари эпидемия билан кураш ҳали узоқ вақт давом этишини ҳам таъкидлаб ўтди.
«Кўпгина давлатлар ушбу эпидемиянинг бошланғич босқичида турибди. Пандемия олдинроқ бошланган баъзи мамлакатларда эса касалликнинг иккинчи тўлқини бошланмоқда. Хато қилманг, биз узоқ йўлни босиб ўтишимиз керак. Ушбу вирус узоқ вақт биз билан бирга бўлади “ деди Тедрос Женевадаги журналистларга виртуал брифингда.
Wellcome Trust халқаро соғлиқни сақлаш хайрия ташкилоти директори Жереми Фаррарнинг таъкидлашича, дунё янги CОVID-19 касаллиги билан яшашни ўрганиши керак.
“Бу тезда якунланадиган жараён эмас. Биз бунга қарши курашиш усулларини топишимизга тўғри келади», деди у Интернет-брифингда.
Uzbek