Вьетнамда коронавирусни юқтириб олгани аниқланган 29 ёшли Стивен Тран икки ҳафта давомида изоляция қилиниши учун касалхонага олиб кетилди. Маълум бўлишича, Тран CОVID-19 нинг енгил формасига чалинган. У бир кун давомида енгил иситмалаган ва бир ҳафта мобайнида йўталиб, там ва ҳид билиш қобилиятини йўқотган.
“Мен тўрт-беш нафар коронавирусга чалинган одамлар билан бир хонада икки ҳафта қолдим. Бизнинг ташқарига чиқишимиз учун хона билан туташган айвон бор эди” деган Тран берган интервьюсида.
Тран икки ҳафталик мажбурий изоляциясидан кейин соғайиб, 7 апрель куни касалхонадан чиқди. Лекин, АҚШнинг касалликни назорат қилиш ва унинг олдини олиш марказининг айтишича, коронавирусга чалинганларни 14 кунлик карантинга олишнинг ҳожати йўқ. Ҳозирда ушбу марказ CОVID-19 чалинганларни касаллик аломатлари бошланганидан 10 кун ўтиб тузалмасалар ҳам изоляциясидан чиқарилиши мумкинлигини айтмоқда.
Марказ яқинда олиб борилган тадқиқот натижаларига асосланиб ушбу хулосага келган бўлиб, мазкур тадқиқотда коронавируснинг енгил ва ўрта формасига чалинган беморларнинг ўзларида касаллик аломатлари бошланганидан 10 кун ўтиб уни бошқаларга юқтиришлари хавфи бўлмайди. Айнан шунинг учун бундай беморлар касалхонадан чиқиш учун қайтадан тест топширишлари шарт эмас.
“Биздаги маълумотлар шуни кўрсатмоқдаки, CОVID-19 нинг енгил ва ўрта шаклини бошидан ўтказаётган беморлар ўзларида вирус аломатлари сезила бошлаганидан 10 кун ўтиб уни бошқаларга юқтирмайдилар” деб ёзган АҚШнинг касалликни назорат қилиш ва унинг олдини олиш маркази ўз сайтида.
Ушбу марказнинг 10 кунлик изоляция етарли эканлиги борасидаги маслаҳатлари инфекцияни бошқаларга юқтириш даври тугаган ва вирусни енгил ҳамда ўрта даражада ўтказаётган беморларга қаратилгандир. Бу маслаҳатлар CОVID-19 нинг оғир шаклидан азият чекаётган одамларга тааллуқли эмас. Чунки, бундай касаллар ўзларида вирус аломатларини сезганларидан бошлаб 20 кунгача уни бошқаларга юқтиришлари мумкин.
Эътибор қилиниши керак бўлган томони шундаки, АҚШнинг касалликни назорат қилиш ва унинг олдини олиш марказининг бу маслаҳати фақат коронавирусни юқтириб олганлар учунгина амал қилади. Яъни, коронавирусга чалинганлар билан мулоқотда бўлганлар учун ҳамон икки ҳафталик карантин тавсия қилинади.
“Сиз CОVID-19 га чалинган одам билан охирги марта мулоқотда бўлганингиздан кейин 14 кун давомида уйда қолишингиз керак” дейилади марказ веб-сайтида.
Uzbek