23 сентябрь чоршанба куни Венесуела президенти Николас Мадуро Бирлашган Миллатлар Ташкилотининг 75 ассамблеясида нутқ сўзлаб, ”тинчликни ҳимоя қилувчи барча мамлакатларни” АҚШ санкцияларига қарши ҳаракатда бирлашишга чақирди. Ҳозирда АҚШ Венесуела, Куба, Никарагуа ва Сурия каби давлатларга нисбатан иқтисодий санкциялар қўлламоқда.
Трамп ҳукумати сўнгги икки йил ичида Венесуелага нисбатан санксияларни кескин кўпайтирди. АҚШ Мадурони ҳукуматдан ағдармоқчи бўлмоқда. Қўшма Штатлар Мадурони коррупция, инсон ҳуқуқларини поймол қилиш ва 2018 йилда бўлиб ўтган президентлик сайловида ғирромлик ишлатганликда айблайди.
“Биз АҚШнинг бир томонлама олиб бораётган барча зўравон сиёсатини бас қилишни, барча санкцияларни бекор қилишни ва бизнинг фуқароларимиз ўзларининг ҳуқуқларидан фойдалана олишларига йўл беришини талаб қилишимиз керак” дейди Николас Мадуро.
Куба ва Никарагуа ҳозирда Лотин Америкасида Мадурони қўллаб-қувватлаётган сўнгги иккита мамлакат бўлиб туришибди. Мадуронинг Бразилия ва Эквадордаги иттифоқчилари ўз мамлакатларидаги етакчилик ўрнини бой беришган.
Шунингдек, чоршанба куни Мадуродан кейин унинг мухолифи бўлган Ҳуан Гуайдо ҳам БМТда нутқ сўзлади. Ҳуан Гуайдо жаҳоннинг 30 та мамлакати томонидан Венесуеланинг қонуний президенти деб тан олинган бўлиб, у ўз нутқида халқаро ҳамжамиятни Мадурони тахтдан ағдариш учун “якуний қарор” ни қабул қилишга чақирди.
“Бугун мен барча аъзо мамлакат вакилларини турли ҳаракатларни амалга ошириш йўлларини ўйлаб кўришга чақираман. Ҳозирда бу муаммони дипломатик йўл билан ҳал қилишнинг имкони қолмади” дейди Гуайдо.
Uzbek