Ўзбекистон таэквондо WTF ассоциациясига янги раҳбар сайланди

0
2000

Бугун, 4 октябрь куни Ўзбекистон таэквондо WTF ассоциациясида навбатдан ташқари ҳисобот-сайлов конференцияси ўтказилди,- деб хабар қилади Миллий олимпия қўмитаси матбуот хизмати.

Ушбу йиғилишда Ўзбекистон Миллий олимпия қўмитаси президенти Умид Аҳмаджонов, ассоциация Ижроия қўмитаси аъзолари, ассоциациянинг вилоят бўлими раҳбарлари, ҳакамлар, мураббийлар, терма жамоа аъзолари иштирок этишди.

Кун тартибидан ўрин олган энг асосий масала ташкилотга янги раҳбар сайлаш эди. Ушбу лавозимга Аҳмаджон Аминджанович Раҳимов номзоди илгари сурилди. Йиғилганлар кўрсатилган номзодини қўллаб-қувватлашди ва якунда Аҳмаджон Раҳимов Ўзбекистон таэквондо WTF ассоциациясининг раиси этиб сайланди.

Конференция давомида Миллий олимпия қўмитаси президенти Умид Аҳмаджонов сўзга чиқиб, таэквондо юртимизда ривожланиб бораётган спорт тури эканлиги, биргаликда ишлаб янада каттароқ муваффақиятларга эришиш мумкинлиги ҳақида гапирди.

Янги сайланган раҳбар ҳам ўз ўрнида ҳамжиҳатликда фаолият олиб бориб, юртимиз довруғини кўкларга кўтариш лозимлигини қайд этиб ўтди.

Маълумот учун, Аҳмаджон Раҳимов 1975 йилда таваллуд топган. Тошкент Давлат Иқтисодиёт Университетини тамомлаган. Оилали. Уч фарзанднинг отаси.

Қайд этиш лозимки, янги раҳбарият олдида у қадар осон бўлмаган вазифа турибди. Яъни, Ўзбекистонда таэквондо спорт турини янада ривожлантириш, оммалаштириш, спортчиларни нуфузли мусобақаларга муносиб тайёргарлик кўриши, шунингдек муваффақиятли иштирокини таъминлаш лозим бўлади.

Миллий олимпия қўмитаси бу йўлда Ўзбекистон таэквондо WTF ассоциациясининг янги раҳбариятига муваффақиятлар тилайди.

Матнда хатоликни кўрсангиз, уни белгилаб Ctrl+Enter ни босинг.

Фикр матни

Илтимос, изоҳингизни киритинг!
Илтимос, исмингизни бу ерга киритинг