АҚШ президенти Дональд Трамп ва Канада бош вазири Жастин Трюдо Гонконгдаги норозилик намойишлари ва Канаданинг икки фуқаросини Хитой ҳукумати томонидан ушлаб турилишини муҳокама қилишди. Бу ҳақда Тасним ахборот агентлиги хабар берди.
Гонконгдаги норозилик намойишлари апрель ойида ҳукуматга қарши аҳолининг тинч йўл билан митинги сифатида бошланган эди. Кейинчалик Хитой Коммунистик партияси учун ҳақиқий бош оғриғига айланди.
Дам олиш кунлари Гонконгда навбатдаги оммавий намойишлар кутилмоқда. Хитой тобора кучайиб бораётган норозилик намойишини терроризмга қиёслади ва уларни йўқ қилиш учун куч ишлатиши мумкинлиги ҳақида огоҳлантирди. Трамп Хитой Президенти Си Цзинпинни зиддиятни бартараф этиш учун намойишчилар билан учрашишга чақирди.
Декабрь ойида Ванкуверда АҚШнинг буйруғига биноан Huawei Technologies Cо молия директори Менг Ванзҳоу ҳибсга олинганидан кўп ўтмай, Хитой канадалик икки кишини ҳибсга олди.
«Икки раҳбар Хитой билан муносабатларни, шу жумладан икки канадаликни ўзбошимчалик билан ҳибсга олиниши ва Гонконгда давом этаётган воқеаларни муҳокама қилдилар», дейилади Reuters хабарида.
Канаданинг Хитой билан тортишуви Трюдо учун бош оғриғи бўлиб қолди ва октябрь ойидаги миллий сайловдан олдин бу тортишувлар барҳам топиши эҳтимолдан йироқ.
Трюдо ва Трамп, шунингдек, Шимолий Американинг янги эркин савдо битимини қўллаб-қувватлашларини яна бир бор тасдиқладилар ва уни ратификация қилиш ишини олқишладилар, дейилади баёнотда.
Uzbek