Душанба куни АҚШ президенти Доналд Трамп хитойлик ҳамкасби Си Цизинпиннинг раҳбарлигини юқори баҳолади. У Хитой раҳбари ва унинг савдо вакилларининг давом этаётган савдо урушини «тинч йўл билан» ҳал этишни танлаганлари учун катта ҳурматга сазоворлигини таъкидлади.
«Улар ҳақиқатни аниқ баён қилишга тайёр эканликларидан жуда таъсирландим. Шунинг учун у буюк етакчи ва буюк давлатнинг вакили. Музокаралар давом этмоқда», деб ёзди Трамп Франциядаги G7 саммитида иштироки чоғида.
Пекин ва Вашингтон ўртасидаги савдо урушининг охирги раунддида Трамп Хитoйдан келтириладиган 550 миллион долларлик товарларга божларни жорий этган. Бунга жавобан Хитой 75 миилион долларлик АҚШ товарларига 5 ёки 10 фоизли божларни киритган ва Америка машиналарига солиқлар қайта тикланган.
АҚШда бўлиб ўтадиган 2020 йилги президент сайловлари олдидан иқтисодий беқарорликлар бўлмаслиги учун Трамп маъмурияти Хитой билан савдо урушини енгиллаштириши кутилмоқда.
Икки мамлакат ўртасидаги савдо уруши давом этаётган бир пайтда июнь ойида, 600 га яқин америкалик чакана савдо корхоналари, фермерлар ва ишлаб чиқарувчилар, шу жумладан Walmart ва Levi Strauss, Трампдан Хитой учун божларни пасайтиришни талаб қилган хатга имзо чекдилар.
Трамп ўзидан олдинги раҳбарлар томонидан музокара қилинган савдо битимларини масхара қилди ва ундан воз кечди. Бироқ, танқидчилар унинг савдо мақсадлари борасида аниқлик йўқлигини ва божлар таҳдиди АҚШлик ишлаб чиқарувчилар, фермерлар, шунингдек, халқаро савдо тизимига зарар етказаётганликда айблашади.
Uzbek