Буюк Британия ҳукумати россияликларга тегишли 18 миллиард фунт стерлингдан ортиқ активларни музлатиб қўйгани сабабли Роман Абрамовичнинг бойлиги 57 фоизга тушиб, 7,8 миллиард доллар бўлиб қолди.
Россиянинг энг бой олигархлари Украинадаги уруш туфайли Ғарб давлатлари қўйган кескин санкциялар туфайли жорий йилда деярли 95 миллиард доллар йўқотди – Кремль урушни бошлаганидан бери улар кунига 330 миллион доллар йўқотди.
Bloomberg миллиардерлар индекси маълумотларига кўра, «Челси» футбол клубининг собиқ эгаси Роман Абрамович энг кўп йўқотган, унинг бойлиги бу йил 57 фоизга тушиб, 7,8 миллиард доллар бўлиб қолган.
Абрамович Британия вазирлари томонидан уни Путин режими билан “очиқ-ойдин узвий алоқада” ва “қўли қонга ботган” бадавлат россиялик бизнесменлар гуруҳининг бир қисми эканлигида айблаганидан сўнг, Британия санкцияларига дучор бўлган биринчи олигархлардан бири бўлди.
Энергетика соҳасидаги миллиардер ва Путиннинг яқин дўсти Геннадий Тимченконинг бойлиги 48 фоизга камайиб, 11,8 миллиард долларни ташкил қилган бўлса, Россия президентининг яна бир иттифоқчиси Сулаймон Керимовники эса Bloomberg индексига кўра, 41 фоизга, яъни 9 миллиард долларга тушиб кетган.
Буюк Британия ҳукумати олигархлар ва бошқа россияликларга тегишли 18 миллиард фунт стерлингдан ортиқ активларни музлатиб қўйди. Бу яқинда эълон қилинган биринчи расмий суммадир. Молиявий санкциялар бошқармасининг йиллик ҳисоботига кўра, 1271 киши, жумладан, Абрамович ва Россиянинг иккинчи энг бой одами бўлган “никель қироли” Владимир Потанинга ҳам нисбатан санкциялар қўлланган.
Британия ҳукуматнинг таъкидлашича, «энг кескин санкциялар» Россия билан боғлиқ активларнинг 18,4 миллиард фунт стерлинги музлатиб қўйишига олиб келди. Бу эса, Буюк Британиянинг бошқа барча санкциялар режими остидаги активларидан деярли 6 миллиард фунт стерлингга кўп дегани.
Bloomberg-нинг кундалик рўйхатида кузатилган йигирма нафар бадавлат россияликлар 2022 йилда 95 миллиард доллар йўқотган.
Бироқ, россиялик милилиардерларнинг йўқотишлари бу йил америкалик технология миллиардерлари кўрган йўқотишларга қараганда анча паст. Илон Маскнинг соф бойлиги, унинг Тесла электромобиль компанияси акциялари қиймати сезиларли даражада пасайганидан кейин қарийб 50 фоизга тушиб, 138 миллиард долларга тушди. Декабрь ойида у дунёнинг энг бой одами сифатидаги тожни LVMH эгаси ва ижрочи директори франциялик Бернард Арнога бой берди.
Мета компаниясига тегишли Facebook эгаси Марк Цукербергнинг бойлиги қиймати 65 фоизга тушиб, 45 миллиард долларга етди. У Bloomberg индексида 19 поғонага пастлаб, 2022 йилни 25 ўринда якунлади, бу 2014 йилдан бери энг паст позицияси бўлди.
Умуман олганда, дунёнинг 500 та энг бой одами 2022 йилда қарийб 1,4 триллион доллар йўқотган.
Uzbek