Россия президенти Владимир Путин Маданият вазирлигига мамлакат кинотеатрларида Украина билан уруш ҳақидаги ҳужжатли фильмлар намойиш этилишини таъминлашни топширди. Шунингдек, томошабинларга “неонацистлар ва неофашистик мафкураларнинг тарқалишига қарши кураш” ҳақидаги суратлар намойиш этилиши керак бўлади.
Бундан ташқари, вазирлик зиммасига ватанпарварлик руҳидаги ҳужжатли фильмлар фестивалига ғоялар тайёрлаш вазифаси юклатилди. Якуний муддат – 1 март куни белгиланган. Маданият вазирлиги раҳбари Ольга Любимова масъул этиб тайинланди.
Путин Мудофаа вазирлигига “Россия ҳужжатли фильм киноижодкорларига босқин иштирокчилари, “жасорат, мардлик ва қаҳрамонлик кўрсатган”лар ҳақида материалларни тайёрлашда ёрдам беришни буюрди. Шунингдек, 1 март куни бажарилган ишлар тўғрисида ҳисобот бериш керак, кейин йилига бир марта ҳисобот тақдим этиш талаб қилинади. Масъул – Мудофаа вазири Сергей Шойгу ва «Ватан аскарлари оилалари қўмитаси» раҳбари Юлия Белехова.
Аввалроқ, Путиннинг ҳарбий хизматчиларнинг оналари билан учрашуви иштирокчиларидан бири режиссёр Олеся Шигина, телевидение ва кинотеатрлардаги мутасаддилар ватанпарварлик мавзусидаги фильмларни саҳнага олиб чиқишни унчалик истамаётганлигидан шикоят қилиб, Путиндан “бу деворни ёриб беришни” сўраган эди.
Ундан Путин билан учрашувга қандай келиб қолганлиги ҳақида сўрашганида, Шигина уни бу ерга Худони ўзи олиб келганини айтганди. Ваҳоланки, бу учрашувга фақат ҳарбий амалдор хонимлар киритилган эди. Путин билан учрашувдан кейин Россия кинотеатрларида унинг Украинадаги уруш ҳақидаги “Жасурлар” («Отважные») номли фильми намойиши ташкил этилди.
Шунингдек, Россия босқинининг йиллиги муносабати билан 24—26 февраль кунлари Москвада «aRTel.doc: Время героев» биринчи халқаро ҳужжатли фильмлар фестивали бўлиб ўтиши, унда Украинадаги уруш ҳақидаги фильмлар намойиш этилиши маълум қилинди.
Фестивалнинг бош продюсери Екатерина Яковлеванинг сўзларига кўра, томошабинларга Мариуполь учун жанглар, «ҳарбий мухбирлар ва Донбассдаги тиббиёт бригадалари шифокорлари ҳаёти» ҳақидаги фильмлар тақдим этилар экан.
Мулоҳаза
Жаноб Путин аввалдан ташвиқотга алоҳида аҳамият бериб келган. Россия пропагандаси учун мисли кўрилмаган миқдордаги маблағлар сарфланиши, бундай фикрларни тасдиқлаши мумкин. Пропаганданинг таъсири шунчалик кучайиб кетганидан, ҳатто Путиннинг ўзи ҳам ундаги ёлғон маълумотларга ишониб кетган, деган мулоҳазалар гоҳида тармоқларда кўзга ташланиб туради.
Украина уруши Россия пропаганда машинасига ҳам жиддий зарар етказмоқда. Машҳур пропагандачиларининг ёлғонлари фош этилиб, омма олдидаги обрў рейтингларини кескин тушиб кетишига сабабчи бўлмоқда. Балки шунинг учун ҳам гибрид урушга Бош қўмондоннинг шахсан ўзи киришишга мажбур бўлаётгандир. Тарихий киноларда кузатганимиздек, урушдаги бундай холат кўпинча жанг майдонидаги аскарларнинг руҳий тушкунликка тушиб, уруш бой берилаётган пайтда кузатилади. Яъни, Бош қўмондон совутни кийиб,от чоптириб жанг майдонига кириб келади. Путиннинг холатида ҳам шунга ўхшаш холат. Фақат реал жанг майдонига кириб келишга унинг жасорати етмаса керак, шунинг учун замонавий гибрид урушида ташаббусни ўз қўлига олган кўринади.
Хуллас, Путиннинг дунёдаги обрў-эътибори борган сари пастга қараб шўнғиб кетар экан, энди у ўз мамлакати ичида қолган обрўсини сақлаб қолиш учун бор диққат эътиборини ташвиқотга қаратаётган кўринади.
Дарҳақиқат, кўпчилик учун, мақомини “халқаро” дея эътироф этилаётган бу фестивалга қайси мамлакатлардан ижодкорлар ташриф буюриши қизиқ бўлса керак. Чунки, Украина урушида Россияни қўллаб –қувватловчи мамлакатлар сони бармоқ билан санарли миқдорда ва уларнинг барчаси инсон ҳуқуқлари поймол этиб келинаётган, диктатура режими ўрнатилган давлатлардан иборат. Ҳар ҳолда фестивалга ўша мамлакатлардан вакиллар ташриф буюришса керак. Яна, ким билсин?
Uzbek