АҚШнинг Нью-Йорк штатида коронавирусга чалиниш билан боғлиқ янги ҳолатларнинг ярмидан кўпи ўз уйида изоляцияда ўтирганлардан чиққан. Бу ҳақда штат губернатори Эндрю Куомо яқинда бўлиб ўтган брифингда маълум қилди.
Штат раҳбарияти маҳаллий шифохоналардаги тождор вирус билан оғриган минг нафар бемор касаллик тарихини таҳлил қилишганда, кутилмаган хулосага келишди. Беморларнинг ярмидан кўпи охирги вақтларини ўз уйларида изоляцияда ўтказгани аниқланган.
“Агар эътибор берсангиз, беморларнинг 18 фоизи қариялар уйидан, 1 фоизидан камроғи қамоқхоналардан, 2 фоизи уйсизлардан, 2 фоизи бошқа жамоалардан бўлса-да, аммо 66 фоизи уйида ўтирган одамлардир, бу бизни шокка туширмоқда. Бу ўзига хос “сюрприз“ бўлди: бу одамларнинг кўпчилиги уйида ўтирган бўлиб чиқяпти. Биз улар балки жамоатчилик транспортида юргандир деб ўйладик ва жамоатчилик транспортида алоҳида эҳтиёт чораларини кўрдик. Лекин аслида бу ҳам сабаб эмас экан. Чунки бу инсонлар деярли уйидан ташқарига чиқишмаган“, — деди Куомо.
Боз устига, касалланиш билан боғлиқ ҳолатларнинг 84 фоизи на жамоатчилик транспортидан фойдаланиш, на кўчада сайр қилиш билан боғлиқ. Уларнинг аксарияти пенсияга чиққан ёки ишсизлардир.
Қайд этиш жоиз, Нью-Йорк штати АҚШ бўйича коронавирусдан энг кўп азият чекаётган ҳудудлардан биридир. У ерда инфекцияга чалинганлар сони 319 мингдан ошиб кетган, вафот этганлар 27 минг нафарга етган. Апрель ойида штатда аҳолини оммавий тестдан ўтказиш натижасида уларнинг ҳар беш нафаридан бирида COVID-19га нисбатан антитаначалар борлиги аниқлан.
Uzbek