Жорий йилнинг 13 декабрь жума куни «Арсенал»нинг Германиялик футболчиси Месут Ўзел Шинжондаги (Шарқий Туркистондаги) уйғурларни қўллаб-қувватлашини билдирди ва мусулмон давлатларини улар учун ҳеч қандай иш қилолмагани учун танқид қилди.
«Қуръон ёқилмоқда… Масжидлар ёпилмоқда… Мусулмон мактаблари таъқиқланмоқда… Дин уламолари кетма-кет ўлдирилмоқда… Ака-укаларимиз зўрлик билан лагерларга юборилмоқда. Мусулмонлар жим. Уларнинг овози эшитилмаяпти”, деб ёзди Ўзел турк тилида ўзининг Твиттердаги аккаунтида.
Хитой ҳукумати Шинжон (Шарқий Туркистон) ҳудудидаги уйғурлар учун “қайта тарбияловчи” лагерларни ташкил этгани сабаб халқаро танқидга учради. Халқаро ҳуқуқни ҳимоя қилиш ташкилотлари ва экспертларнинг таъкидлашича, ушбу қаттиқ назорат қилинадиган лагерларда бир миллиондан ортиқ уйғурлар ва бошқа миллатга мансуб мусулмонлар тўпланган.
Дастлаб бундай лагерлар мавжудлигини рад этган Хитой ҳукумати кейинчалик уларни экстремизм ва зўравонликка қарши курашга қаратилган касб-ҳунар мактаблари деб таърифлаган.
Uzbek