Малайзия ва Индонезия дунёдаги энг қадимги ўрмонзорларнинг ватани ҳисобланади. Шу билан бирга бу икки мамлакат дунёдаги палма ёғининг 85% дан ортиғини ишлаб чиқаради. Бироқ, қишлоқ хўжалигининг ривожи ва нефт ишлаб чиқаришнинг кўпайиши ўрмонларнинг камайиши, ифлосланиши, ернинг емирилиши ва одамлар хамда ёввойи ҳаёт ўртасида курашларни келтириб чиқарди. Малайзия ва Индонезиядаги ўрмонларнинг кесилиши Борнео филларини ҳам хавф остига қўйди. Улар учун ўрмон яшаш жойи ва озуқа манбаидир. Ҳозир баъзи плантацияларда бу жонзотларнинг ўрмон бўйлаб эркин ҳаракат қилишлари учун экологик йўлакларни яратиш устида иш олиб борилмоқда. Қуйида сиз бу ишларга оид суратлар билан танишишингиз мумкин.
Борнео оролидаги Сабаҳ штатида ёш ва катта палма дарахтлари табиий чангалзор бўйлаб ёйилган. Ҳозирда палма дарахтлари кўпайиши учун ўрмонларни кесиш тақиқланган, Сабаҳ ерларининг 30 фоизигачасини ҳимоя қилинадиган ҳудудларга айлантириш режалаштирилмоқда.
Айни пайтда Борнео филлари йўқ бўлиб кетиш хавфи остида. Уларнинг сони тахминан 2040 тани ташкил қилади. Ўрмонларни қишлоқ хўжалик экинзорларига айлантириш натижасида уларнинг яшаш ҳудудлари йўқолиб бориши филларнинг омон қолишига асосий таҳдид ҳисобланади.
Борнео фили палма плантациясини кезмоқда ва кесилган палма дарахтларининг таналарини емоқда. Қишлоқ хўжалиги ландшафтларидаги бундай экологик коридорлар ҳайвонларнинг омон қолиши учун жуда муҳимдир. Ушбу ўтиш йўллари филларга тоза сув ва кенг яйлов майдонларига кириш учун ўрмон ичида ҳаракатланиш имкониятини беради.
Борнео филлари тўлиқ улғайгач, кунига 150 кг гача ўсимлик истеъмол қилади. Улар асосан палмалар, ўтлар ва ёввойи бананларни истеъмол қилади. Филлар ҳар куни катта масофани босиб ўтадилар.
Палма дарахти плантацияларини бетартиб кесиш, асосан Индонезия ва Малайзияда ўрмонларининг камайишига олиб келди ва ҳозирги пайтда Жанубий Америка ва Африкадаги ўрмонлар ҳам айнан шу хавфга дуч келмоқда.
Uzbek