Дональд Жон Трамп 1946 йилнинг 14 июнида таваллуд топган бўлиб, у Американинг 45-президенти ҳисобланади.
Трамп иқтисодчи дипломига эга. Қўшма Штатлар президентлигига сайлангунга қадар у бизнесмен ва телеюлдуз бўлган. Таъкидлаб ўтиш жоиз, Трамп 2016 йилги сайловларда ғалаба қозонгач, юқори даражали ҳукумат лавозимида фаолият юритмаган ёки ҳарбий бўлмаган АҚШнинг биринчи Президентига айланди.
2017 йил 20 январда Трампнинг инаугурацияси бўлиб ўтди ва шундан кейин ўтган дастлабки 100 кунда у АҚШ тарихида салмоқли из қолдирган шов-шувли қарорларга имзо чекди. Жумладан, Мексика чегарасида девор қуриш, аҳолисининг асосий қисми мусулмонлар бўлган бир қатор мамлакатларга саёҳатни чеклаш ва иқлим муаммоларига бағишланган Париж шартномасидан чиқиб кетиш.
Инаугурациядан бир кун ўтиб эса, мамлакатда ва ундан ташқарида ҳам Трампга қарши кенг миқёсдаги норозилик намойишлари бўлиб ўтади. Вашингтондаги «Аёллар Марши»да Трампнинг иммиграциядан тортиб, атроф-муҳитни муҳофаза қилишгача бўлган турли масалаларга нисбатан позициясига қарши чиқиш учун ярим миллиондан ортиқ одам иштирок этган.
Шуни ҳам алоҳида таъкидлаб ўтиш жоизки, Трампнинг ҳозирга қадар бўлган президентлик даврида унинг атрофида турли танқидлар ва можаролар ҳукм суриб келмоқда.
Айниқса, унинг 2017 йилнинг январь ойи охирида имзолаган ва Ироқ, Сурия, Эрон, Судан, Ливия, Сомали ва Ямандан келган муҳожирларнинг АҚШ ҳудудига киришини 90 кунга, қочқинларнинг киришини эса, вақтинча 120 кунга тўхтатиб қўйишни назарда тутувчи қарори катта муҳокамаларга сабаб бўлди. Трамп Christian Broadcasting Network’га берган интервьюсида Қўшма Штатларга киришга уринган насроний қочқинларга устунлик беришини айтган.
Бундан ташқари, унинг Шимолий Корея раҳбари Ким Чен Ин билан адовати ҳам барчага таниш. Трамп ва Ким ўртасида муносабатлар аввалида ҳукм сурган танглик сабаб, Америка Президенти дунёни ядро уруши ёқасига олиб келишда айбланган эди.
Бундан ташқари, Трамп дунё иқтисодиётига бемисл таъсир кўрсатган Хитой билан савдо урушини ҳам бошлади. Иқтисодиётнинг кўплаб тармоқларида ўзаро ҳамкор бўлган бу икки мамлакат ўртасидаги кескинлик ён атрофдаги мамлакатларга ҳам бевосита таъсир кўрсатганлиги ҳақиқат.
2017 йилнинг 6 декабрида эса, Трамп бутун дунёда қизғин муҳокама қилинган ишга қўл урди: У Қуддусни расман Исроил пойтахти сифатида тан олди ва Тель Авивдаги Америка элчихонасини Қуддусга кўчиришга қарор берди.
Украина Президенти Владимир Зеленский билан боғлиқ сўнгги можаролардан сўнг эса, 2019 йилнинг 29 сентябрида Америка Сенати Спикери Дональд Трампга қарши расмий равишда импичмент сўрови бошланганлигини эълон қилди. Эслатиб ўтамиз, Америка тарихида фақат икки бора Сенат томонидан амалдаги Президентга нисбатан импичмент эълон қилинган: 1868 йилда Эндрю Жонсонга ва 1998 йилда Билл Клинтонга нисбатан.
Дональд Трамп оилали, 2005 йилда собиқ модель Мелания Трамп билан турмуш қурган. Бунга қадар у икки марта ажрашган. Беш фарзанднинг отаси.
Uzbek