Саммит мезбони, Аргентина президенти Маурисио Макри Costa Salguero кўргазма марказида юқори даражадаги меҳмонларни кутиб олди.
Саммит “Ҳалол ва барқарор келажак” шиори остида бўлиб ўтади.
Германия канцлери Ангела Меркель самолёти билан юз берган муаммо сабабли саммитнинг биринчи кунини ўтказиб юборади. Таъкидланишича, канцлер Аргентинага 30 ноябрь кечки пайт етиб келади. Шу сабабли унинг АҚШ президенти Дональд Трамп ва Хитой раиси Си Цзиньпин билан 30 ноябрга белгиланган учрашувлари бекор қилинди.
Саммитнинг асосий мавзуси анъанавий равишда савдо, рақамли иқтисодиёт, иқлим ўзгаришлари, барқарор ривожланиш ва гендер тенглик бўлади.
Бироқ АҚШ ва Хитой ўртасидаги савдо зиддиятлари саммитнинг муваффақиятли ўтишини шубҳа остига қўймоқда.
G20 глобал иқтисодий ва молиявий ҳамкорлик масалаларини муҳокама қилиш учун мўлжалланган йирик форум ҳисобланади. G20 дунёнинг йирик ривожланган ва ривожланаётган давлатларини бирлаштиради, бу давлатлар ҳисобига дунё ялпи ички маҳсулотининг 85 фоизга яқини тўғри келади.
Форумни бутун дунёдан келган уч мингдан зиёд журналист ёритиб бормоқда.
Саммитда 19 давлат раҳбарлари ва 15 мингдан ортиқ вакиллар, жумладан, Европа Иттифоқининг вакиллари иштирок этмоқда.
Буэнос-Айресда саммитга қарши давом этаётган норозилик намойишлари сабабли хавфсизлик чоралари кучайтирилган.
Аргентина пойтахтидаги бўлиб ўтаётган саммитни хавфсизлик хизмати кучларининг 20 мингдан зиёд ходимлари хавфсизлигини таъминлайди.
Биринчи учрашувнинг якунидан сўнг етакчилар икки томонлама учрашувлар ўтказадилар ва сўнгра “Колон” опера театри биносида уюштириладиган маданий тадбирда қатнашадилар.
Икки кун давом этадиган саммит якуний декларацияни имзолаш ва якунловчи маросимда Аргентина президенти Маурисио Макрининг маърузаси билан якунланади.
Uzbek