Британиянинг дори воситаларини ишлаб чиқарувчи компанияси AstraZeneca 25 августда COVID-19 қарши ўзининг даволаш услубини синовдан ўтказишни бошлади.
Мазкур муолажа услуби орқали инсон танасида вирусга қарши курашувчи антитаначалар шакллантирилади.
AstraZenecaнинг маълум қилишича, дастлабки синовларда AZD7442 деб номланган дорининг хавфсиз ва чидамли экани текширилмоқда. Мазкур дори иккита бир хил генли антитана (mAbs) элементларидан ташкил топган бўлиб, у синовларнинг биринчи босқичида 18 ёшдан 55 ёшгача бўлган 48 нафар одамга берилади.
Агар мазкур синов ижобий натижа билан якунланса, AstraZeneca дорини иккинчи ва охирги учинчи босқичда кўпроқ одам билан текширувдан ўтказади. Ушбу доридан коронавирусга чалинганларни даволашда ҳам, вирусдан ҳимояланишда ҳам фойдаланиш режалаштирилмоқда.
mAbs номли сунъий антитаначалар инсон организмида инфекцияга қарши курашиш учун табиий тарзда пайдо бўладиган антитаналардек ҳаракат қилади. mAbs ларни лабараторияда ишлаб чиқариш мумкин бўлиб, улар олимлар томонидан маъқулланган. Ҳозирда mAbs лардан ракнинг баъзи турларини даволашда фойдаланилади.
AstraZeneca компанияси коронавирусга қарши дориларни яратиш учун июнь ойида АҚШ ҳукуматидан 23.7 миллион доллар миқдорида маблағ олди. Шунингдек, мазкур компания яратаётган вакцина ҳам синовларнинг охирги босқичига етиб келган.
Uzbek