Суриядан Россияга ҳарбий техника июль ойида Sparta II савдо кемаси томонидан экспорт қилинган, деб ёзади Bloomberg. Туркия бу кемадаги юкларни назорат қилмаган.
Россия июль ойида АҚШ санкцияси остидаги “Sparta II” савдо кемасида Суриядан қурол-яроғ ва ҳарбий техника олиб чиқишга муваффақ бўлди. Шундай қилиб, Москва Россиянинг Украинага қарши уруши бошида Туркия томонидан жорий этилган ҳарбий кемаларнинг Босфор ва Дарданел бўғозлари орқали ҳаракатланишига қўйилган тақиқни четлаб ўтди, деб хабар берди Bloomberg.
Хабар қилинишича, “деярли аниқ” ҳарбий техникаларни олиб кетаётган кема Суриянинг Россия ишлатаётган Тартус портидан чиқиб, Новороссийск портига етиб келган. Айни пайтда НАТО аъзоси бўлган Туркия унинг юкини текширмаган.
Bloomberg маълумотларига кўра, SpartaII Россия Мудофаа вазирлиги назоратидаги «Оборонлогистика» компаниясига тегишли бўлиб, АҚШ санкциялари остида ҳисобланади. Агентликнинг қайд этишича, бу кема авваллари, Россиядан Сурияга ҳарбий техника олиб ўтиш учун бир неча бор ишлатилган.
Украина Ғарбдан миллиард долларлик қурол олаётган бўлса, Россия ҳам бу каби эҳтиёжларини таъминлаши керак, деб эслайди Bloomberg.
АҚШ маълумотларига кўра, ярим йилдан бери давом этаётган Украина билан урушда Россия Қуролли Кучлари ўн минглаб қурбонлар ва ярадорлар, шунингдек, бир неча минг ҳарбий техникани йўқотган.
Uzbek